Inuit innarluutillit sukkanerusumik sullinneqartalissapput
Inuit innarluutillit tapersersorneqarnissaat pillugu inatsisissaq aappaagu atuutilersussaq ilaatigut kommunit suliassamik paamaarussisut akiligassinneqartalernissaannik aalajangersakkamik imaqassaaq
Inuit innarluutillit tapersersorneqarnissaat pillugu inatsit januaarip 1-ani 2020-mi atuutilerpat inuit innarluutillit siullertut maluginiagassaasa ilaat tassaavoq, kommunini suliamik ingerlatsisarnerup sivikinnerulernissaa, suliamik ingerlatsinerit qanoq sivisutiginissaannut piffissaliussaqartoqalissammat.
- Suliamik ingerlatsinerit sivisuut pisariaarutissapput. Kommunimi amusartumik suliassarpassuaqarpoq suliarineqarnissaminnik utaqqissunneqartunik, inuillu pineqartut inuit innarluutillit pillugit peqqussutip ataaniilissapput. Tamanna oqarsinnaavugut qaangikannersimagipput. Taamatut eqqarsarusuppunga, nalunaarsueriaaseq assingusoq atuukkunnaassammat, kisianni kommuninit qanoq aaqqinneqassanersoq suli ilisimanngilarput, kisianni siunissami taama kipparitsigisumik nalunaarsuisarneq pisariaarutissaaq. Eqqarsarpunga pisariaqartitsisunut tamanna oqilisaataassasoq, inuit innarluutillit illersuisuat Christina Johnsen oqarpoq.
Paamaarussinerit akeqartinneqartariaqartut
Siusinnerusukkut apeqqarissaarfigineqarninni uannut oqarputit, kommunit ilaanni suliamik ingerlatsinerit ilaatigooriarlutik ukiunik sivisussuseqarsinnaasartut, ilimagaajuk tamanna maanna allanngussasoq?
- Inatsisip naggataatungaani pillaasarnermik aalajangersagaq maluginiarsimavarput, tassani allassimammat Naalakkersuisut kommuni pinngitsaaliissummik akiligassissinnaagaat, tassunga ilanngullugu ullormut akiligassanik, suliassamik paamaarutiginnippata. Neriuppunga tamanna sioorasaarutaannaanngitsoq, tamanna piviusunngortinneqartassaaq, aamma aalajangersimasumik periaaseqartariaqarput. Kusassaataaginnassanngilaq, suliamik paamaarussinerit akeqartinneqassapput, Christina Johnsen oqarpoq.