Inuit innarluutillit pisinnaatitaaffitik ilisimanerussavaat
Inuit innarluutillit illersuisoqarfiat Tilioq inuit innarluutillit pillugit isumaqatigiissummik atuaruminarsakkamik kalaallisut saqqummersitsivoq. Inuit innarluutillit pillugit isumaqatigiissut tamakkiisoq - ilaatigut inatsisit pillugit paasiuminaassinnaasunik paasissutissartalik - siuliani kisimi saqqummersinneqarnikuugaluarpoq.
“Inuit innarluutillit pisinnaatitaaffii pillugit isumaqatigiissut kikkunnit tamanit paasineqarlunilu atuarneqarsinnaasaqarpoq”. Naalagaaffiit Peqatigiit inuit innarluutillit pillugit isumaqatigiissutaani ilaatigut taama allaqqasoqarpoq. Kalaallit Nunaat Naalagaaffiit Peqatigiit inuit innarluutillit pillugit isumaqatigiissutaannik 2012-imi malinnissalluni akuersivoq, maannamullu isumaqatigiissut tamakkiisoq kalaallisut atuarneqarsinnaasimavoq. Taama itsillugu paasiuminaassinnaalluni. Tamannali Inuit Innarluutillit Illersuisoqarfianiit maanna allanngortinneqarpoq, isumaqatigiissut atuaruminarsarlugu saqqummiunnerasigut, taamaasilluni isumaqatigiissutip siunertaa paasiuminarnerulerlunilu atuaruminarnerulersillugu.
- Uannut pingaaruteqarluinnarpoq innuttaasut tamarmik pisinnaatitaaffitik nalunngissagaat, taamaattumik isumaqatigiissut atuaruminarsarlugu saqqummersipparput, neriulluta innuttaasut pisinnaatitaaffimminnik paasinnilluassasut, inuit innarluutillit illersuisuat, Christina Johnsen tusagassiutinut nalunaarummini allappoq.
Isumaqatigiissut atuaruminarsagaq Sisimiuni 9.-11. november 2018-imi Tiliup isumasioqatigiisitsinerani ataatsimeersuartitsineranilu saqqummiunneqassaaq, saqqummersinneqarneralu NunaFondenimit taperneqarpoq.
Isumasioqatigiinnermi ataatsimeersuarnermilu Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaat sammineqassaaq, aammalu isumaqatigiissut atorlugu inuiaqatigiinni qanoq ilillutik inuit innarluutillit atugaat pitsanngorsarneqarsinnaanersut paasiniarneqassalluni.
Isumasioqatigiinnermut innarluutillit peqatigiiffii nunatsinnersuut tamarmik qaaqquneqarsimapput. Peqatigiiffiit amerlanersaat peqataajumallutik nalunaaruteqarput, peqataasussallu inuit 30-t missaaniittut peqatigiiffinnit 12-init aggersuupput, taakku Ilulissaniit Ittoqqortoormiillu tikillugit peqataasoqassapput.
Peqatigiiffiit namminneq kajumissutsiminnik suliaqartarneq, aaqqissuussaaneq, paasititsiniaanerlu isumaqatigiissut qitiutillugu sammisaqassapput. Taakkulu saniatigut aamma Thorkild Olesen, Danske Handicaporganisationimi siulittaasoq isumasioqatigiinnermi peqatigiiffilerisarneq pillugu misilittakkani oqalugiutigissavai.
Ulluni marlunni isumasioqatigiisitsineq nuna tamakkerlugu ataatsimeersuarnermik naggaserneqassaaq. Ataatsimeersuarnermut Namminersorlutik Oqartussat, kommuneqarfiit, pisortat ataanni susassaqarfiit, innarluutilinnullu tunngassuteqartunut soqutigisallit aggersarneqarput. Ataatsimeersuarnermi Kalaallit Nunaanni inuit innarluutillit pisinnaatitaaffii pillugit isumaqatigiissutip atuutsinneqarnera killiffissiorneqassaaq.
Ataatsimeersuarnermi killiffissiuinerup saniatigut aamma inuit innarluutillit pisinnaatitaaffii pillugit isumaqatigiissut tunngavigalugu qanoq suleqatigiinnerunikkut inuit innarluutillit atugaat pisinnaatitaaffiilu siunissami eqeersimaartumik pitsanngorsarneqarsinnaanersut qimerloorneqassaaq.
Isumasioqatigiinnermi ataatsimeersuarnermilu peqataasut tamarmik inuit innarluutillit pillugit pisinnaatitaaffii pillugit isumaqatigiissummik atuaruminarsakkamik tunineqassapput. Atuagaq akeqanngitsumik Tiliumut aaneqarsinnaavoq.