Inuit Innarluutillit Illersuisuat: Meeqqat immikkut pisariaqartitsisut puigorneqartarput
Oqartussat meeqqanik immikkut pisariaqartitalinnik malinnaasut, meeqqat ikorfartorneqarnissaat anguniarlugu misissortinnissaannut innersuussinissamut tunuarsimaartarput.
Meeqqat immikkut pisariaqartitallit imaanngilaq innarluuteqartut. Oqartussalli, assersuutigalugu atuarfik meeqqap misissorneqarnissaa anguniarlugu Meeqqat Inuusuttullu pillugit Siunnersuisarfimmut (MISI) innersuussinissamik tunuarsimaarpat, taava meeqqap innarluutigisinnaasaasa misissorneqanngisaarnarnissaat ilimanarluinnarpoq, taamalu meeraq pisariaqartitaminik ikiorserneqanngisaannarlunilu tapersersorneqanngisaannassaaq.
Immikkut atuartitsinermi atuartitsisut misissuisoqarnissaanik kammaattuuteqartaraluartut, susoqarneq ajorpoq, Inuit Innarluutilli Illersuisuat Christina Johnsen oqarpoq.
- Meeraq immikkut pisariaqartitalik innarluutilillu misissorneqartanngippat, siunissami ilinniagaqalersinnaaneranut periarfissat annikillissapput. Meeraq ikiorneqarani imminuinnaq isumagisalissaaq.
Tiliup Qaanaamut angalasimaneranut nalunaarusiap saqqummiutereerneranit Christina Johnsen Sermitsiaq.AG-mit apersorneqarnermini taama nassuiaavoq.
- Meeqqanut immikkut pisariaqartitsisunut tunngatillugu suliaqarnissamut tunuarsimaartoqartarnera erseqqilluinnarpoq, Christina Johnsen oqarpoq.
Innnersuussisannginnermut pissutaasinnaavoq, meeqqap atuarfimmi ilinniartitsisut ilaannut qanimut atassuteqarpallaarnera. Meeqqap qanimut atassuteqaataa, soorlu angajoqqaanut ilaqutaasoq ikinngutaasorluunniit ilinniartitsisuuppat, atassuteqaateqarneq inissimaffik pillugu nipangiussinermik nassataqartarpoq. Tamannalu amerlasuutigut attaveqartarneq attatiinnarusullugu innersuussinnginnermik kinguneqartarluni, Inuit Innarluutillit Illersuisuat oqarpoq.
Meeqqat arlallit oqaaseqanngitsut
Inuit Innarluutilli Illersuisuata Christina Johnsenip Tilioq peqatigalugu Avannaata Kommunianiikkami tupaallaatigisimavaa, meeqqat arlallit suli atualersiamngitsut atuartullu oqaatsinik suli atuilersimannginnerat.
- Meerarpassuaqarpoq oqalunniarnerminnik ajornartorsiuteqartunik. Meeqqat inuusuttullu oqaatsinik atuinngitsut. Arlaqarput oqaatsinik atuilernissaminnut tunngaviusumik sakkussaqanngitsut, aamma misissorneqartanngillat, taanna oqarpoq.
Tassa ilaqutaasullunniit meeqqap qanoq oqalunnera paasisinnaanngilaat.
Christina Johnsenip oqaluttuaraa, meeraq tusilartuuguni, naqinnernik ilisarinnissinnaanngikkuni allatulluunniit paasinnittarnikkut innarluuteqaruni oqaatsinik atuisinnaanngissinnaasoq. Taamaattoq meeqqat oqaatsinik atuilernissaat anguniarlugu qanoq ikiorserneqarlutillu tapersersorneqarsinnaanersut arlaannaannilluunniit oqaluuserineqanngilaq
- Imminnut isumagisassanngortillugit sumiginnarneqarput. Ikorniarlugit iliuuseqartoqanngilaq. Tamanna akuersaarneqarsinnaanngilaq, Christina Johnsen oqarpoq.
Tiliumit oqaatigineqarpoq, inuit innarluutilli ikiorserneqarnissaat tapersersorneqarnissaallu pillugit ilisimasanik amigaateqartoqartoq. Qaanaami inuit innarluutilli ilinniagaqarnissamut periarfissaqanngillat. Ilinniarfiusinnaasoq qaninnerpaaq, Ado Lyngep Atuarfia, Aasianniippoq. Atuarfimmut innersuussiniartarneq ajornartuuvoq, aammali ungasinnera inuusuttunut innarluutilinnut kajumissuseerutsitsisarpoq.