Inuit innarluutillit illersuisuat: Innarluuteqartoq arlaannaalluunniit kisimiissanngilaq

Nunatsinni inuit innarluuteqartut illersuisuata inuk innarluutilik kinaluunniit kisimiissannginnera pillugu suliniuteqarniarluni, Naalagaaffiit Peqatigiit inunnut innarluutilinnut ullorititaanut atatillugu oqalugiarnermini oqarpoq.

Nunatsinni inuit innarluuteqartut ulluinnarni kiserliorlutik kisimiittutulluunniit misigisarput. Nunatsinni inuit innarluutillit illersuisuata, Anja Hynne Nielsenip aaqqissuussinerit aaqqiissutillu nutaat sulissutigiumavai inuit innarluutillit inuiaqatigiinni peqataatinneqarnerulernissaat anguniarlugu.

- Tassunga atatillugu aqqutissaq pingaaruteqartoq tassaavoq inuit innarluutillit pillugit isiginneriaatsit pimoorussilluta allanngortinniassagivut, kikkullu tamarmik inuiaqatigiit iluanni peqataatinneqarnissaat sulissutigissagipput. Politikikkut periarfissiissaagut, innuttaasutullu periarfissaq tamanna akorlugu inuit innarluuteqartut ulluinnarni peqataanerulersillugit suliffeqarfinni, ilinniarfinni sunngiffimmilu sammisaqartitsinermi, Anja Hynne Nielsen Naalagaaffiit Peqatigiit inuit innarluutilinnut ullorititaannut atatillugu oqalugiarnermini oqarpoq.

Tilioq inuit innarluutillit inuiaqatigiinni akuutinneqarnerunissaat pillugu ukiuni arlalinni suliniuteqareersimavoq. Anja Hynne Nielsenip sammisat qitiusut sisamat sulissutigissallugit taavai.

Sammisat qitiusut ukuussapput:

  • Ilinniartitaaneq Ilinniartitsinerlu
  • Inissiat
  • Innuttaasut nalinginnaat akornanni nukittorsaanissaq
  • Innarluutillit pillugit paasinnittaatsit paqumisuutillu

Aaqqiissutissaq ataasiinnanngilaq

Anja Hynne Nielsen 1. december sulilerpoq. Taassuma erseqqissarpaa aaqqiissutissat allaanerusut sulissutigineqartariaqalersut, inuit innarluutillit inuiaqatigiinni akuutinneqarnerulissappata.

- Aaqqiissutissat inummit innarluutilimmiit inummut innarluutilimmut assigiinngiiaartarput, assigiimmik innarluuteqaraluarpataluunniit. Inuttut nammineq qinigassiisarnissaq aamma periarfissaasariaqarpoq, oqarpoq.

Taassuma oqaluttuaraa meeqqat inersimasullu killilimmik piginnaasaqartut timersornikkut, kulturikkut sammisaqartitsinermi suliffeqarnissamulluunniit peqataatinneqarneq ajortut. Ilisimasaqarneq, alapernaassuseq ikiuukkusunnerlu aallaavigalugit naapitsisaraanni inuiaqatigiit tamanut ilorrisimaarnarnerulissasut, taassuma oqaatigaa.

Suliniuteqajaannginneq akisusinnaavoq

Anja Hynne Nielsenip oqalugiarnermini tikkuarpaa inuit innarluutillit pillugit suliniutit aallartiaanngikkaanni tamanna inuiaqatigiinnut akisunerulissasoq. Suliniutit tulluartut ingerlannerini amerlanerusut sulilersinnaapput, ilaqutaasut oqilisaanneqarnerusinnaapput inuillu innarluuteqartut nammineernerulersinnaallutik.

Anja Hynne Nielsenip takorloorpaa inuiaqatigiit pappiliatiguinnaanngitsoq FN-ip innarluutillit pillugit isumaqatigiissutaa malittarissagaat:

- Takorluugara tassaavoq Tiliumi inuit ersitsumik ersinngitsumillu piginnaasakillisimasut piviusumik inuiaqatigiit iluannut piviusorsiortumik peqataatinnissaat sulissutigissagipput, aamma assigiinngiiaassuseq sunaanersoq paasillugu ataqqillugulu. Tilioq tassaassaaq suleqatissaq eqeersimaartoq, ilisimasanik qitiusoqarfiusoq pilersitsiortortorlu, innuttaasut innarluuteqartut pisinnaatitaaffiisa nalinginnamik akuerineqarnerulissasut, politikikkullu qanorluunniit nuna tamakkerlugu najugarisamilu eqqarsartarnermi ilanngunneqartassasut.

Powered by Labrador CMS