Inuit innarluutillit illersuisuat: Assigiinngisitsinerup taamaatinneqarnissaa pisariaqartoq

Inuit innarluutillit assigiinngisitsilluni pineqarnissaannut pinngitsoortitsisussanik Kalaallit Nunaanni inatsiseqanngilaq. Tamanna allanngortinneqassaaq, inuit innarluutillit illersuisuat Christina Johnsen isumaqarpoq.

FN-ip nunani tamalaani inunnut innarluutilinnut ullorititaani Nunatsinni innarluutillit illersuisuat, Nunat Avannarliit assigalugit inunnik innarluutilinnik assigiinngisitsinermut inerteqquteqarnermut inatsisinik Kalaallit Nunaanni atuutsitsisoqalernissaanik oqariartuuteqarpoq.

- Inuit innarluutillit immikkoortillugit assigiinngisitsineq suli akuersaagaavoq. Taqqakkut milikartoorneq imaluunniit arlaatigut ajoqusernermik tunngaveqarluni pisinnaasat apparneri pillugit sulisutut soraarsitaasarneq suli akuerineqarluni atuuppoq. Issiavinnik kaassuartakkanik atuisut diskotekinut neriniartarfinnulluunniit isersinnaaneri killilersorneqarput. Issiavinnik kaassuartakkanik atuisut bussinut taxanullu atuinissaat suli ajornarsaarunneqartarpoq. Kalaallit Nunaanni inuit innarluutillit immikkoortinneqartarnertik pillugu suliffeqarfiup iluaniippat avataaniikkaluarpalluunniit suli illersugaanngillat, Christina Johnsen tusagassiuutinut nalunaarummi assersuusiorpoq.

Nunat allat inatsiseqarput

Nunat avannarliit allat assigiinngisitsisoqannginnissaanut inatsiseqarneranut, taanna unnersuussivoq. Ukioq manna juulip aallaqqaataani Danmarkimi kikkunnut tamanut atuuttumik immikkoortitsisoqartannginnissaanik inatsimmit atuutitsisoqalerpoq.

- Inuiaqatigiit ilutsinni nutaaliaasumi nukittuutut isigissagutta inuiaqatigiinnilu kikkunnut tamanut peqataatitsisagutta inatsisitigut tulluarsaanissaq pinngitsoorneqarsinnaanngilaq, kikkut tamat assigiimmik pineqarlutik immikkoortitaasutullu misigisannginnissaat pinngitsoortinniassagutsigu inatsimmik naapertuuttumik tunngaveqartariaqarpugut, inuit innarluutillit illersuisuat isumaqarpoq, aperaarlu:

- Pisut aallaavigalugit arlaannik isorisaqaraangatta sakkortuumik qisuariarsinnaasarpugut, soorlu suviaassuseq, suminngaaneersuuneq, qanoq qalipaateqarneq, upperisaq atoqatigiinnikkut inissisimaneq, ukiut, politikkikkulluunniit isummersortaatsit pillugit oqaluttoqartillugu sakkortuuliorsinnaasarpugut. Taava sooq inuit innarluutillit eqqartorneqartillugit assigiinngitsilluni pissusilersorneq akuersaassavarput?

Powered by Labrador CMS