Skip to main content

Inuit innarluutillit illersuisuat ernumavoq: Inatsisitigut piumasaqaatigineqartoq illersuisoqarsinnaaneq kommunit paamaarutigaat

Inuit innarluuteqartut pisortanut saaffiginninnerminni ikiorteqarnissamik pisariaqartitsikkajupput. Inuit innarluutillit tapersersorneqarnissaannut inatsit malillugu, inuit innarluutillit illersuisoqartassapput, tamassumunngali kommunit suli piareersimanngillat.

Inuit innarluutillit tapersersorneqarnissaannut Inatsisartut inatsisaata atuutilernissaannut qaammataannanngulerpoq.

Januaarip aallaqqaataani 2020-mi inatsit atuutilerpat, kommunit tassani akisussaaffeqangaatsiarput.

Inuit innarluutillit illersuisuata Christina Johnsenip suliani illersuisoqartalernissaq qilanaaraa, inatsisilli atuutilernissaanut eqqarsaatersuuteqarpoq.

- Ernumanartippara inuit innarluutillit illersuisoqartalernissaannut tunngatillugu inatsisip atuutilerneqarnissaanut ukiut pingasut ingerlaratarsinnaanerat. Meeqqammi kommunini suliani illersuisoqartilernissaannut piffissaq taama ingerlasimavoq. Inatsisip atulernissaanut ullut 40-junnaarput, kommunillu ilaat saaffiginnittarput aperalutik qanoq iliussanerlutik. Naalakkersuisunut innersuutiinnartarpagut, taakkuummata malittarisassanik suliaqartussat. Suliap ingerlaneranik allamik tusagaqanngilagut, oqarpoq.

Saaffiginnittartut amerlapput

2018-ip aallartinneraniit oktoberimi 2019-ip tungaanut inuit innarluutillit illersuisuata suliaqarfianut saaffiginnittut 350-it missaanniipput. Innuttaasut siunnersorneqarnissamik aqqutissiuunneqarnissamillu siunertaqarlutik saaffiginnittarput.

Inuit innarluutillit ilaqutaasullu paasiniaasarput suliani ikiorneqarnissartik qanoq pisinnaanerlugu.

- Pingaartumik pisortanut saaffiginninnermi, soorlu Ombudsmandimut aamma isumaginnittoqarfik pillugu maalaaruteqartarfimmut. Inuit innarluutillit ilaasa nammineq saaffiginninnissaq immersugassanillu immersuinissaq ajornakusoortittarpaat, pingaartumik saaffiginnissutit immersugassallu nittartakkamiitillugit. Sumiiffiit ilaat internetimut attavigissaartuunngillat, maalaaruteqassatillugulu immersugassat immersornissaannut ikiortissamik aamma pisariaqartitsisoqartarpoq, Christina Johnsen oqarpoq.

Suliat marloqiusat

Inatsit atuutilerpat kommunit illersuisoqartitsinissamut pisussaaffeqalissapput. Kommunip illersuisoqartitsinissaq akisussaaffigissavaa, Naalakkersuisulli maleruagassanik, soorlu toqqaanermut, akissarsiaqarnermut pinerluuteqarsimannginnermullu allagartanik aallernissamut suliassat isumagissallugit.

Christina Johnsen ilisimatitsivoq inuit innarluutillit inuunerannut illersuisut pingaarutilimmik inissisimasussaasut. Pingaartumik pisortanut attaveqarneq apriilimi 2020-mi e-boksikkut taamaallaat ingerlalerpat.

- Taamaammat pingaaruteqartittariaqarparput inuit toqqaannartumik pisortanut saaffiginnittarnerat ammatiinnassallugu. Sulimi inoqarpoq IT-mik atuinermik sungiussivissimanngitsunik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER