Inuit innarluuteqartut najugaanni quliusunit qulingiluani atornerluisoqarsimasinnaanera ilimatsaanneqartoq

Kalaallit Nunaanni inuit innarluuteqartunut najugarineqartut quliupput. Arlaannaanulluunniit attuumassuteqanngitsut misissuinerisa takutippaat taakkunannga qulingiluani pissutsit ajorluinnarsinnaasut.

Nalunaarusiaq naapertorlugu najugaqarfissatut neqeroorutini quliusuni, qulingiluani najugaqartunut kinguaassiuutitigut kannguttaatsuliortoqarsimaneranik atornerluisoqarsimaneranilluunniit sulisut aqutsisulluunniit pasitsaassisimapput imaluunniit ilisimasaqarlutik.

- Arlaleriarluni qangali pisimasuusimasunik suliaqartoqartarnikuuvoq. Pisut ilaat ukiut kingulliit ingerlaneranni suliaasimapput. Ilaannikkooriarluni ulloq unnuarlu najugaqarfissatut neqeroorutini allani pisimasunik ilisimasaqartoqartarpoq, aamma pisuni allani ulloq unnuarlu najugarfissatut neqeroorummi nammineq suliffigisami pisimasunik ilisimasaqartoqartarluni, nalunaarusiami "Inunnut innarluutilinnut najugaqarfissatut neqeroorutini kinguaassiuutinut tunngasutigut pissutsit aamma kinguaassiuutitigut innarliisarnerit"-ni, sapaatip akunnera kingulleq saqqummersumi, nassuiarneqarsimavoq.

- Assigiinngitsunik maani sulisunik pedeleqartarnikuuvugut. Tamanna politiitigoornikuuvoq. Misiginikuuarput pedelit ineqartunut kajungilersitsisartut. Pisut assigiinngitsuunikuupput. Taava taanna pedeleqartarneq unitsinnikuuarput, taava perorsaasutut iliniarsimasoq sannavimmi illersugaasumi sulisoq atortarparput, immikkoortortaqarfinni arlaannik suliaqartoqassatillugu ineqartunik sulisunillu suleqateqartarluni. Taamaaliornikkut tamakku pinngitsoortinniarsarivagut, aqutsisoq oqaluttuarpoq.

Politiinut tunniussinerit arlallit

Nalunaarusiaq kinaassutsimik suliffiullu sorliuneranik ilisarnarunnaarsitsisimasutut suliaavoq. Najugaqarfissatullu neqeroorutit sorliit kinguaassiuutitigut atornerluisimanermik pasitsaassiffiunersut aamma ilisimanniffiunersut, taamaattumik allaqqanngillat.

Inuit innarluuteqartut najugaanni Ivaaqqami, najugaqartoq kinguaassiuutitigut atornerlugaasimanera paasineqareersorlu, arlaannaannulluunniit attuumassuteqanngitsunit najugaqarfittut neqeroorutinik misissuisoqarnissaa Naalakkersuisut piumasarisimavaat. Ivaaqqami atornerluisoqarneranut tunngatillugu siornatigut sulisuusimasoq pineqaatissinneqarsimavoq.

Najugaqarfinni sulisut aqutsisullu kinguaassiuutitigut atornerluisoqarsimaneranik kannguttaatsuliortoqarsimaneranillu pasitsaassinermi iliuuserineqartussat malinneqartartut ilisimatitsissutigaat. Aqutsisut arlallit politiinut tunniussisarsimapput, sulisunillu soraarsitsisarlutik.

- Sulisoq soraarami puigugaqarsimavoq. Taamaattumik taanna puigukkani aaniarlugu ulloq unnuarlu najugarfissatut neqeroorummut uteqqissimavoq. Taassuma tassani malugivaa, arnap ineqartup inaanut matu parnaaqqasoq. Siusinnerusukkulli arlaannik pisoqartartoq pasitsaanneqarnikuuvoq, kisiannili uppernarsaatissaqarnani. Politiit erngerlutik takkupput, forstanderi erngerluni takkuppoq.

- Politiit ineqartoq ingerlaannaq napparsimmaviliaappaat, sulisorlu taanna ingerlaannartumik tigummigallarneqalerluni. Ineqartoq misissorneqarpoq, kingornalu angerlarteqqinneqarluni, najukkatut neqeroorummi sulisoq nassuiaateqarpoq.

Innersuussutit arlallit tunniunneqartut

Misissuisitsinermit nalunaarusiami, Statens Institut for Folkesundhedimit suliarineqartumit, kinguaassiuutitigut kannguttaatsuliornerit atornerluinerillu pinngitsoortikkumallugit innersuussutit arlallit saqqummiunneqarput.

Innersuussutigineqarpoq nakkutilliinermut aalajangersimasumut ilanngullugu ulloq unnuarlu najugaqarfissatut neqeroorutit kinguaassiuutinut tunngasutigut, pisinnaatitaaffitsigut aamma kinguaassiuutitigut kannguttaatsuliorfiginninnissap pitsaaliornissaanut tunngatillugu qanoq periuseqarnerlutik pillugu nalunaaruteqartassasut. Ilanngullugu innersuussutigineqarpoq pasinapiluttoqartillugu kalerriisoqarsinnaaneranik aaqqiissummik, whistleblowerimik taaneqartartumik, peqalertoqarnissaa.