Inuit innarluuteqartut amerlanerusut sulilernissaannik suliniuteqartoqarpoq
Ataatsimoorussamik suliniutip nutaap, innuttaasut innarluutillit amerlanerusut sulilersissavai. Qeqqata Kommunia Innarluutillillu illersuisoqarfiat Tilioq, suliniut nutaaq pillugu suleqatigiinnissamik isumaqatigiissusioqqammerput.
Qeqqata Kommunia aamma Tiliup suliniutigaat innarluutillit amerlanerusut suliffeqalernissaat.
Tamanna Qeqqata Kommunianit tusagassiutinut nalunaarutigineqarpoq.
- Suliniut una nutaaq pissanganartuuvoq, innuttaasunullu ataasiakkaanut iluaqutaassasoq upperaara. Innuttaasugut innarluutillit pitsaasumik sulisinnaanerinik periarfissaqarnissaat, kommunimit pingaartinneqarpoq, Ilaqutariinnermut ataatsimiititaliami siulittaasoq Hans Frederik Olsen oqarpoq.
Ilisimasaqarnerulernissaq
Suliniut suliniuteqqaataavoq aammalu Qeqqata Kommunianut tamarmut iluaqutaassalluni. Suliniut suliaasimasut malillugit sulinerussaq, tassuunakkullu innuttaasoq innarluutilinik sulinermini sunik unammillernartunik misigisaqartarnersoq paasineqassalluni.
- Siunissami atorsinnaasatsinnik immikkoortumi ilisimasanik misilittakkanillu nutaanik pilersitsinissaq pingaartorujussuartut isigivarput. Sulisoqarnermut inatsimmut atatillugu malittarisassanik tammartajaarnartulerujussuuvoq, innarluuteqaruillu suliffimmi ataannarnissaq ajornakusoorsinnaalluni. Taamaattumik neriuutigivarput, ilisimasanik pingaarutilinnik suliniut una pilersitsissasoq, suliniummik aqutsisuusussaq, Tilioq-mi Suliniutini suleqataasoq Anna Ida Hallgaard Jonsson oqarpoq.
Suliffeqarfiit ammanerulernissaat
Suliniut inunnik pingitsaaliilluni sulilersitsissanngilaq, kisianni suliffeqarnermik ammasumik pilersitsissalluni, taamaalilluni inuit innarluutillit nammineq kissaatitik malillugit inuiaqatigiinnut tunniussaqarsinnaanissamut periarfissinneqassallutittaaq.
Innuttaasut innarluutillit amerlanerusut sulilersinnerisigut, inuunermut pitsaanerusumut aamma imminut aalajangernerusinnaanermut inunnut ataasiakkaanut tunngavissiisoqassaaq.
Siunissamut pilersaarutit
Suliniutip iluatsissinnaaneranut piumasaqaataavoq, Qeqqata Kommuniani suliffeqarfiit sulisitsisullu inooqataanermut akisussaaffimmik tigusinissaat, suliffinnik eqaatsunik pilersitsinissaat aammalu inuit innarluutillit atorfinitsinnissaannik naleqarneranik takunninnissaat.
- Siunissami Kalaallit Nunaanni sumiiffinnut amerlanerusunut suliniutip siammarnissaa eqqarsaaaavoq, tusagassiutinut nalunaarummi oqaatigineqarpoq.