Inuit innarluuteqartunut politikki pillugu Tilioq ataatsimeersuartitsilerpoq
Inuit innarluuteqartut pillugit suliniaqatigiiffik inuit innarluuteqartunut politikki pillugu ataatsimeersuartitsilerpoq. Peqatigiiffiit arlallit, politikerit soqutiginnittullu allat Ilulissani ataatsimeersuarnermi peqataassapput.
Politikerit, naalakkersuisoqarfimmi pisortat, isumaginninnermut siunnersortut inuillu innarluuteqartut peqatigiiffiini ilaasortat, inuit innarluutilinnut politikki pillugu Ilulissani marlunngorpat ataatsimeersuartussanngorput.
Inuit innarluuteqartunut illersuisoq Anja Hynne Nielsen ataatsimeersuartitsinissaq sioqqullugu seminarimut, kiisalu aataatsimeersuarnissamut soqutiginnittoqarluarnera nuannaarutigaa. Seminari 13.-15. maj ingerlanneqassaaq, ataatsimeersuarnerlu 16. maj ingerlanneqassalluni:
- Ataatsimeersuarneq annertuumik soqutigineqarneranit paasinarsivoq amerlasuut innarluutillit atugaat ajorluinnarnerannik takunnissimasunik. Aamma ilimagaara tamatuma takutikkaa, politikerit oqartussaaffiillu inuiaqatigiittut inunnut innarluutilinnut isiginnittariaaserput iliuuseqarfigiumaneqartoq, taamaalilluni tunngaviusumik inuit pisinnaatitaaffii eqqortinneqarlutik, Tiliumi innarluutillit illersuisuat Anja Hynne Nielsen oqarpoq.
Suliaqarusunneq annertusarneqassaaq
Tilioq ilisimatitsivoq inuit innarluuteqartut qanigisaallu tapersersorneqarnissartik anguniarlugu ullut tamarluinnaasa ilungersuuteqartartut, amerlasuullu tunniutiinnarlutik nunatsinniit nuuttartut ikiorluarneqarnerunissaq anguniarlugu.
Ataatsimeersuarnermi akisussaaffiit akimorlugit pitsaanerusumik suleqatigiinnissaq anguniarneqarpoq, FN-illu inuit innarluuteqartut pillugit isumaqatigiissutaata tamakkiisumik nunatsinni atuutilernissaa anguniarlugu sulisoqarnissaa anguniarneqarluni.
- Nunatsinni innarluuteqaraluaraanniluunniit kikkut tamarmik inissaqartinneqarnissaat qanoq qulakkeersinnaanerlugu oqartussaaffiit, ilisimasallit aamma nuna tamakkerlugu innarluutillit peqatigiiffii naapillugit ataatsimoortippagut, inuit innarluutillit illersuisuat oqarpoq.
Misilittakkat pillugit oqallinneq isumassarsiallu
Ataatsimeersuarnermi misilittakkat oqaluuserineqassapput, pitsanngorsaanissamullu aaqqiissutissatut siunnersuutit eqqartorneqassallutik.
- Aaqqissuussaaneq pinnagu - inuk qitiutillugu, sinaakkutinik politikkimillu pilersitsinissamik pisariaqartitsivugut. Massakkoqqissaaq sullissinermi ingerlariaatsit pissutigalugit innuttaasut amerlavallaat annaasarpagut. Aaqqissuussineq nutaanngilisoq namminerlu susassaqarfiit kisiisa eqqarsaatigalugit suleriaaseqarneq unitsinneqarnissaa pisariaqartipparput, Anja Hynne Nielsen oqarpoq.
Seminari ataatsimeersuarnissarlu aallartitsinnagit Tilioq Ilulissani tamanut ammasumik qaaqqusissaaq, arfininngornermi 13. maj. Qaaqqusinermi qulequtarineqarpoq Nothing about us without us, tassa Naalakkersuisoqatigiit Siumut aamma IA-p Naalagaaffeqatigiinnerup iluani nunarput nunanut allanut oqaloqatigiissutigineqartarneranut tunngatillugu oqariartuutaat.