Inuit Esport unammersuartitsinissamut piareerluinnarput
Nunatsinni internetikkut attaveqarluni spillerluni unammersuartitsinissaq siulleq marlunngorpat ingerlanneqassaaq. Inuit Esportimi siulittaasup naatsorsuutigaa unammersuartitsisarnerit aallartilluassasut, aammali unammilligassanut piareersimallutik.
Nunatsinni internet atorlugu spillertartut angerlarsimaffimminniit Call of Duty: Warzonemi unammersuarnissamut piareersinnaanngorput.
Peqatigiiffik Inuit Esport marlunngornermi 28. juni nunatsinni siullermeerlutik internetikkut spillimik unammersuartitsinissaminnut piareerput.
Inuit aqqaneq-marluk ilaasortanngoreersimalerput unammersuarnissamullu peqataanissamut nalunaarsimallutik. Peqatigiiffiullu pissanngatigaa unammersuarneq aallartippat peqataaniarlutik nalunaarsimasut qassiujumaarnersut.
- Nunatsinnit tamarmit, videomillu unammersuarnissamik nassuiaatitalimmik paasinnissinnaasut tamarmik, unammersuarnissamut peqataanissamut tikilluaqqusaapput. Piumasaqaataaginnarpoq peqatigiiffitsinnut ilaasortanngornissaat, unamminissamullu peqataaniarlutik nalunaarnissaat, Inuit Esportimi siulittaasoq Emanuel Hansen Frederiksen Sermitsiaq.AG-mut oqaluttuarpoq.
Unammilligassat sillimaffigineqarput
Emanuel Hansen Frederiksen ilisimatitsivoq unammeqataasut spillimi angusaminnik ilisimatitseqataanissaminnut akisussaaffimmik tiguseqataasariaqartut. Katillugit angusat, pisarisat, sumiiffik nalunaaqutarlu ilanngullugit nalunaarutigineqartassapput.
- Soorunami onlinemi ingerlatsinitsinni nakkutilliisoqartussaavugut, unammisut angusaat qulakkeertartussaallugit. Unammeqataasulli angusaminnik ilisimatitsinissaat pingaaruteqarpoq, taakku najoqqutaralugit uagut qulakkeerinnittassangatta, Emanuel Hansen Frederiksen oqarpoq.
Peqatigiiffik paasititsivoq internet atorlugu unammersuartitseqqaarnissaq misileraanertut atortussaasoq. Siulittaasulli naatsorsuutigaa unammersuarnermi siullermi misilittagarilikkat unammersuarnernut tulliusussanut iluaqutaalerumaartut.
- Soorunami unammersuarnissamut pissangavugut, unammeqataasullu takunissaat qilanaaralugu. Unammilligassanut sillimavugut, naammassilluarnissaalu anguniassuarput, Emanuel Hansen Frederiksen oqarpoq.
Unammersuarnermi ajugaasoq 5.000 koruuninik pinnattaassaqartinneqarpoq. Pinnattaassat katillugit pingasuussapput.