Skip to main content

Inuit Ataqatigiit: Avatangiisinut atatillugit iliuutsivut kinguneqartarput

Nunami partiit annersaat Sisimiut eqqaani saarulliit toqorarnerat pillugu qisuariarpoq. Inuit Ataqatigiinnit Aalisarnermut Naalakkersuisoq aaqqiissutissarsioqquneqarpoq, taamatullu pisoqaqqinnginnissaanik qulakkeerinneqquneqarluni. Royal Greenlandimit suliaq misissorneqarpoq.

- Saarullit uumatitsivimmiittut toqorarnerisa isigineqarnerput ajoqusissavaat, IA-mi avatangiisinut atatillugit oqaaseqartartoq Pipaluk Lynge-Rasmussen oqarpoq.

Saarulliit tonserpassuit uumatitsivimiittut toqungasut pillugit videoliarineqarsimasoq Facebookikkut saqqummiunneqarsimavoq. Royal Greenlandi nittartakkamigut ilisimatitsivoq, aalisartut Sisimiuneersut arfinillit Maniitsumeersullu ataatsip aalisakkat pisaat qassutini uumatitsivinni bundgarninilu saarullinniutiniittut toqorarsimasut. Toqorarsimanerinut suna peqqutaasimanersoq Royal Greenlandimit paasiniarneqartoq. 

- Pisoq qaqutigoorluinnarpoq. Qassutinik uumatitsivinnik taamak amerlatigisunik bundgarninillu pisat piffissap taamak sivikitsigisup iluani toqorarsimanerat siornatigut misiginikuunngilarput. Qassutini uumatitsivinni ukiumut annerpaamik ataatsini marlunniluunniit saarulliit toqungasut siumortarpagut, Royal Greenlandimi Saarullinnut Assagiarsunnullu tunngatillugit ingerlatsinermi pisortaq Sten Sørensen oqarpoq.

Pipaluk Lynge-Rasmussenip piumasaraa, suliamut politikkikkut akuliuttoqassasoq

- Inuit Ataqatigiinnit saarulliit uumatitsivimiittut toqorarnerat ajuusaarutigineqarlunilu alianartutut isigineqarpoq. Aalisarnermi aningaasaqarnitsinni inuussutissasiuteqarnitsinnilu tunngaviummat, nunani tamalaani inissisimanitsinnut pingaaruteqarluinnarpoq. Saarulliit uumatitsivinni toqorarnerat avataanit isigineqarnitsinnut akornusiisinnaavoq, Pipaluk Lynge-Rasmussen (IA) silamut atatillugu ilungersuuteqartartutut aamma ilisimaneqartoq oqarpoq.

Taassuma Aalisarnermut Piniarnermullu Naalakkersuisoq Aqqaluaq B. Egede kaammattorpaa, taamatut pisoqaqqinnginnissaa qulakkeerniarlugu aaqqiissutissarsiussasoq.

- Imminut napatittumik aalisarnermik inuussutissarsiuteqarnerput ineriartortissagutsigu avatangiisitta sutigut tamatigut allanngorsinnaanera eqqumaffigisariaqarparput. Inuit Ataqatigiinnit isumaqarpugut, siulitta inuunerminni tunngavigisimasaat, tassalu pinngortitaq uumasullu nunarsuup sinneranut tunisassagutsigit illersortariaqarpavut, inuiaqatigiittullu ataatsimoorluta akisussaaffimmik tigusisariaqarluta, Inatsisartuni ilaasortaq Pipaluk Lynge-Rasmussen naggasiilluni oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER