aningaasaqarnermut inatsit

Inuit Ataqatigiit qallunaat aningaasaqarnermut inatsisissaannut aamma taaseqataaniarput

2015-imut aningaasaqarnermut inatsisissap pingajussaaneerlugu Folketingemi oqallisigineqarnissaa aqaguttorlu, aningaasaqarnermut ministerip socialdemokraatineersup Bjarne Corydonip, Inuit Ataqatigiit kissaataat akuerai

IA-mit Johan Lund Olsen

2015-imut aningaasaqarnermut inatsisissaq pingajussaaneerlugu Folketingemi pingasunngornemri oqaluuserineqassaaq. Inuit Ataqatigiit aningaasaqarnermut ministeri socialdemokraatineersoq Bjarne Corydon kissaatigisaminnik oqaloqatigisareerlugu, aningaasaqarnermut inatsisissamut taaseqataaniarput.

- Nutaarsiassatsialaavoq uannut anngunneqaqqammersoq, tamannalu toqqammavigalugu oqaasertussatut aqagu oqaasissakka allanngorput, Johan Lund Olsen oqarpoq.

Atuaruk: Lund Olsen: Aningaasaqarnermut inatsip isumaqatiginninniutigineqarnera naammaginanngilluinnarpoq

Atuaruk: Siumut IA-lu ataatsimiittoqannginnerani: Angusaqarnissaq sulissutigineqassaaq

Kalaallit immikkut aningaasaliiffigineqartut
Inuit Ataqatigiit aningaanut inatsisissap isumaqatigiinniutigineqarnerani kalaallit Danmarkimut nuuttartut immikkut aningaasaliiffigineqarnissaat ilaatigut kingullertigut kissaatigisimavaat.

- Tamanna akuerineqarpoq 4 million koruuninik 2015-imi aamma taamatorluinnaq 2016-imi aningaasaliisoqartussanngormat. Tassa katillugit 8 million koruunit kalaallinut Danmarkimut noorlaanut pitsaaliuinermut ukiuni marlunni tullerni atorneqartussanngormata, Johan Lund Olsen oqarpoq.

Pineqaatissinneqarsimasunut toqqammaviusartut pillugit nalunaarut
Tamatuma saniatigut Inuit Ataqatigiit pineqaatissinneqarsimasunut toqqammaviusartut aammalu allanut tapersersortitut inissittartut pillugit nalunaarutip 2015-imit atuutilersinnissaa kissaatigisimavaa. Nalunaarut taanna aningaasanik aamma malitseqartussaavoq, tassami nalunaarusiornikkut qallunaat kalaallillu taama atulersartut aningasarsiaasa assigiinngissutaat nalimmassartussaammagu.

- Nalunaarut ukiuni arlalinni anguniarneqarsimavoq, kinguartinneqartuartarsimallunilu. Kiisami maanna 2015-ip qaangiutinnginnerani piviusunngortussanngorpoq, Johan Lund Olsen oqaluttuarpoq.

Aningaasanut inatsisissaq pingasunngornermi pingajussaaneerlugu oqallisigineqassaaq. Ulloq naggaserlugu allannguutissatut siunnersuutit 63-it taasissutigineqassapput. Aningaasaqarnermullu inatsisissaq sisamanngornermi inaarutaasumik taasissutigineqassalluni.

- Tassalu maanna atlantikup avannaamiuisa pingasut taaseqataaneratigut pisussanngorpoq, Johan Lund Olsen naqissusiivoq.

Siumut aamma taaseqataassaaq
Folketingimi ilaasortanngorlaap Siumumeersup Nick Nielsenip aningaasaqarnermut ministerimut Bjarne Corydonimut Socialdemokraatimeersumut inatsisissatut siunnersuutaanut taaseqataaniarluni nalunaarpoq.

Nick Nielsen Nepalimi juullisiorniarlunilu ukiutoqarsiussamaartoq nittartakkami allaaserineqartareerpoq. Politikkeri aamma qaqqasiornermik nuannarisaqarluartoq Mount Everestimi basecampiliassaaq 5.365 meterinik qatsitsigisumi.

Siumumi politikkerip aningaasaqarnermut inatsip Folketingimi taasissutigineqarnerani peqataasinnaannginnini pissutigalugu taaseqataasussaanngitsumut isumaqateqarpoq taasissanatik.

Atuaruk: Inatsisit pitsaanerulernissaat Siumumit IA-miillu suli sulissutigineqarpoq

Powered by Labrador CMS