Inuit Ataqatigiit mittarfinnut pilersaarutaat saqqummiunneqassaaq

Mittarfinnut tunngatillugu pilersaarut qanoq isikkoqarsinnaanersoq Inuit Ataqatigiinnit saqqummiunneqassaaq. Tamanna tusagassiortunik katersortitsinermi nalunaaqutaq 11.00 saqqummiunneqassaaq, tusagassiutinut nalunaarummi partii allappoq.

Partii Naalakersuisooqatigiinnik pilersitsisinnaasoq aamma ilimanarsiartorpoq. Partiinik allanik oqaloqateqarlutik Sara Olsvigip pingasunngormat oqaatigaa.

Partii akisussaaffimmik tigusinissamut piareersimasoq gruppimi siulittaasup Múte Bourup Egedep oqaatigaa.

- Piffissanngorpoq nunatsinni politikkikkut patajaatsumik ingerlatsineq. Politikkikkut sulineq ilumoorsaartumik timitaliiffigalugu aallartinniartigu. Uagut piumavugut nukissaqarluarlutalu nunatsinni unamminartut aaqqiivigeqataaffiginissaannut. Politikkikkut pissaaneqarniuuttoqarnera naalakkersuisooqatigiillu toqqisisimmanngitsitsinerat qaangerneqarsinnaanngippat akisussaaffitsik pisinnaasunut tunniuttariaqalerpaat, tusagassiutinut nalunaarummi allappoq.