Inatsisartut
Inuit Ataqatigiit gruppianni nutaamik siulittaasoqalerpoq
Agathe Fontain ukiorpassuarni Inuit Ataqatigiit Inatsisartuni gruppianni siulittaasooreerluni nutaanik misilittagaqarusunnini pissutigalugu gruppimi siulittaasutut tunuarpoq
Inuit Ataqatigiit Inatsisartuni gruppianni Peter P. Olsen siulittaasunngorpoq.
Aamma Qaasuitsup Kommuniani ilaasortaavoq.
- Partiitut illuatungiliuttunut siuttuusutut inissisimanerput suliassavut pingaaruteqartutut isigaavut. Kinguneqartitsilluartumik isumaqatiginninniaqataasarnissarput angusaqarluarnissarpullu siunertaralugu Inatsisartuni sulivugut nukittuumillu sulilluartumillu gruppeqarnissarput tamatumani pisariaqarpoq. Piffissami aggersumi gruppemut siulittaasutut suliassannut qilanaarpunga, partiip gruppeformandertaava Peter P. Olsen tusagassiuutinut nalunaarummi oqarpoq.
Siulittaasup tullia
Inuit Ataqatigiit Inatsisartuni gruppianni Agathe Fontain siulittaasup tulliatut inissinneqarpoq.
Naaja Nathaniselsen Inuit Ataqatigiit sinnerlugit aningaasaqarnermut oqaaseqartartuulerpoq.
Taanna politikkikut oqaaseqartartuujunnaarpoq. Tassami politikkikkut oqaaseqartartuulerpoq partiip siulittaasuata tullia, Aqqaluaq B. Egede.
Aqqaluaq B. Egede politikkikkut misilittagaqarluartuuvoq, tassami kommunimi Inatsisartunilu ukiorpassuarni ilaasortaavoq. Inuit Ataqatigiit naalakkersuisuutitaqarneranni aamma politikkikkut oqaaseqartartuusareerpoq.
Ilaasortanngortoq
Inuit Ataqatigiit Inatsisartut ataatsimiititaliaanni ilaasortaaffinnik aamma nikititerisussaavoq. Partiip Folketingimut ilaasortaatitartaava, Aaja Chemnitz Larsen, Inatsisartunit sulinngiffeqassalluni nalunaarnikuuvoq sinniisorissavaalu Múte Bourup Egede. Ataatsimiititaliani inissititernerit nutaat Inatsisartuni ukiaanerani ataatsimiinnerup aallartinnerani nalunaarutigineqarumaarput.