Inuit ataatsimoortut nutaat namminersulivinnissaq oqaluusererusuppaat
Nittartagaq nutaaq namminneq piumasussilinnit politikkeriunngitsunillu saqqummiunneqarpoq. Pineqarlutik nunami innuttaasut kinaassusaat amma Kalallit Nunaata kiffaanngissuseqalernissaanut aqqutissaq. Inuit ataatsimoortut taakku nutaat namminersulivinnissamut peqataatitserusullutillu ammasumik oqallitsitserusupput.
Nittartakkami inuitnutaat.org-imi ilaatigut sammineqartut uku atuarneqarsinnaapput: Inuiaqatigiit tarningat peqqissuunngitsoq, namminiliivinnissamut aqqut, qanoq namminersulivittoqarsinnaava, aamma inatsisit tunngaviusut naalagaaffimmilu innuttaassuseqarneq.
- Kalaallit Nunaanni innuttaasugut nunanilu allani najugaqartugut Kalaallit Nunaata namminersortunngornissaanik pingaartitseqalutalu sulissuteqarpugut, inuiaat kiffaanngitsut imminnut akisussaaffigeqqullugit, ilisarititsinermi allassimavoq. Inuit 13-it nittartakkamik pilersitsisimapput, maannakkorpiarlu Facebookikkut malinnaasut 250-it missaanniillutik.
Inuit Nutaat pilersitsisuisa kissaatigaat, Kalaallit Nunaat namminersuvissoq pillugu tigussaasumik oqallittoqarnissaanut innutaasut ilarpassui peqataasinnaassasut.
Sooq aamma qanoq
Nittartakkamik pilersitsisut ilaasa sisamat taamatut suliniuteqarnermut tunngaviusut Sermitsiaq.AG-mut oqaluttuaraat.
- Tamattaalluta inuunitta ilaani namminersulivinnissamut apeqqut sammisimavarput, aamma ataatsimut naleqartitaqarpugut.
- Namminersulivinnissaq namminersulivinnissamullu aqqutissaq pillugit oqallinnermi kikkut tamarmik peqataatinneqarnissaaq kissaatigaarput. Pineqartut isumatuumik oqallisigineqassapput.
- Namminersulivinnissaq pillugu oqallittoqarnerani ilanngutassiarineqarneranilu oqallittarnerit avissaartuutsitsilersartut misigisarparput. Uagut isitsinni uagut ukulu pineqanngillat. Kikkut tamarmik Kalaallit Nunaanni Kalaallillu Nunaat pillugu sullisserusuttut tikilluaqqusaapput.
- Tamatta innuttaaqataavugut, tamattalu tunniussaqarsinnaavugut. Politikkeriusariaqanngilagut.
- Sorlavut pingaaruteqarput, taakkulu sammissavavut tulluussimaarutigalugillu, taamaalilluta kinaassuserpiarput nassaarisinnaavarput.
- Immitsinnut nakkarsarata siumukartillutali oqaloqatigiittassaagut, taamaalilluta ilutsinni nukissaqarlualissaagut, innuttaasut tamarmik iluminni nammineersinnaanerulersillugit.
Rasmus Olsvig, Gorm Geisler Vold, Arnajaraq Poulsen aamma Ann-Britta Olsvig taamatut oqaaseqarput. Taakkua erseqqissaatigaat naleqartitat ataatsimoornermillu misigissuseqarneq qitiutinneqassasut.
Innuttaasunik katersortitsisarniartut
Pilersaarutaavoq oqallitsitsinerit, saqqummiussinerit, videot, paasititsiniaanerit oqaloqatigiinnerillu aqqutigalugit namminersulivinnissap oqaluuserineqarnissaa.
Neriuutigineqarpoq innuttaasut katersuutsinnerisigut nuna namminersulivissinnaassasoq. Nittartakkami naalagaaffimmi innuttaassuseqarneq pillugu inatsisissatut siunnersuuteqarpoq, aamma aningaaqarnikkut qanoq namminersulivinnissaq anguneqarsinnaanersoq pillugu eqqarsaatit tigussaasut atuarneqarsinnaapput.
Saqqummiussaq kikkunnit tamanit pissarsiarineqarsinnaavoq, aamma politikkerinit namminersulivinnissamut aqqutissamut aaqqiissutaasinnaasutut siunnersuutigineqartunik soqutiginnittunit, Inuit Nunaannik pilersitsisut ilisimatitsipput.