Inuit arfineq-marluk arlaleriarlutik nakuusersimasutut unnerluutigineqarlutik eqqartuussaalersut
Inuit arfineq-marluk, pisimasut 13-it pillugit unnerluunneqarlutik februaarimi eqqartuunneqartussanngorput. Unnerluunneqartut nakuusersimasutut unnerluunneqarput.
Nakuusernerit arlallit, ujajaaneq ataaseq, ikiaroornartumik eqqussisimasutut unnerluussut ataaseq, ikiaroornartumillu tuniniaaqqinnissamik siunertaqarluni tigummiaqarnermut unnerluussut ataaseq.
Unnerluussutit taakku Kommuneqarfik Sermersuup Eqqartuussiviani februaarimi suliarineqassapput.
Inuit arfineq-marluusut pisimasunut katillugit 13-inut unnerluutigineqarput, taakkunanngalu ataaseq nakuusersimasutut pisimasumut ataatsimut ilassutitut unnerluunneqarluni.
Isumaqatigeereernerup kingorna nakuusernerit
Pisimasuni unnerluutigineqartuni arlalinni nakuusertut allamut isumaqatigiissuteqareernerup kingorna pinerluffigisaminnut nakuusertarsimapput.
- Ulloq (ullua nalunaaqutaalu, aaqq.) … Nuummi, peqatigiillutik aammalu isumaqatigeereerlutik aammalu/imaluunniit paaseqatigeereerlutik (pinerluffigineqartoq, aaqq.) nakuuserfigigamikku, unnerluutigineqartut (pinerluffigineqartoq, aaqq.) qasseeriarlutik tilluaramikku, ilaatigut saviminermik tilluuserlutik, niaquatigut timaatigullu, ilaatigullu (pinerluffigineqartoq, aaqq.) nunami nalasoq, aammalu unnerluutigineqartut (pinerluffigineqartoq, aaqq.) nunami nalasoq isimmigarlugu, taamaalilluni (pinerluffigineqartoq, aaqq.) niaquatigut arlalinnik ikeqalersillugu, pisimasut ilaat unnerluussummi taama allanneqarsimavoq.
Pisimasut unnerluutigineqartut januaarimi 2016-ip decemberillu 2018-ip akornanni pisimapput.
Unnerluussisussaatitaasup piumasaa
Unnerluussisussaatitaasup ilisimatitsissutigisinnaanngilaa inuit arfineq-marluk imminnut qanoq ilisarisimanersut, aammalu pinerluffigineqartut unnerluunneqartunut qanoq attuumassuteqarnersut.
Pisimasulli suliarineqartussat 13-it ataatsikkut eqqartuussivimmi suliassanngortinneqarnerannut tunngavilersuutigineqarpoq, takunnittut pisimasunik arlalinnik takunnissimasarmata.
- Inuit arfineq-marluk pineqartut ataatsikkut eqqartuussivimmiinnissaannut pissutaavoq takunnittut arlallit pisimasuni arlalinni takunnittuusimammata. Takunnittullu minnerpaamik persaqusersorniarlugit inuit arfineq-marluusut ataatsikkut eqqartuunneqartussanngorput, Kalaallit Nunaanni Politiit Sermitsiaq.AG-mut ilisimatitsipput.
Qaammatini pingasuniit ukioq ataaseq qaammatillu sisamat tungaannut unnerluutigineqartut pineqaatissinneqarsimasunut inissiisarfimmiitinneqarnissaat, unnerluussisussaatitaasup piumasaraa. Ilanngullugu taarsiivigineqarnissamik piumasaqartoqarsinnaanera sillimaffigeqquneqarpoq.