Inuit 7.240-t suli akiuussutissalerneqarsimanngillat
Nunatta Nakorsaaneqarfiata kisitsisaataasa kingulliit takutippaat, innuttaasut 16-ileereersimasut tallimararterutaat inulaarlugit suli akiuussutissalertissimanngitsut. Innuttaasut 40 procentii tamakkiisumik akiuussutissalertissimapput.
Nuummi innuttaasut 2.200-t sinnerlugit amerlassusillit sapaatiummat akiuussutissalerneqarsimapput.
Taamaalilluni illoqarfiit pingaarnersaanni innuttaasut katillugit 15.104-t siullermik kapitissimalerput, taakkunanngalu 9.146-t tamakkiisumik akiuussutissalerneqarsimallutik.
Nuummi inuit 3.500-t suli akiuussutissalertissimanngitsut akornanni 600-t sapaatiummat siullermeersumik kapitissimapput.
Nunamut tamarmut tunngatillugu kisitsisit kingulliit takutippaat, innuttaasut 35.267-it siullermeersumik kapitissimasut, taakkunanngalu 22.351-it tamakkiisumik akiuussutissalerneqarsimasut. Kisitsisitigut paasissutissat uani takukkit.
Nunaqarfimmi akiuussutissalersuineq ornigarneqarpallaanngitsoq
Avannaani akiuussutissalersuineq ornigarneqarpallaarsimanngilaq. Upernavimmi inuit tallimaagaangata ataaseq covid-19-imut akiuussutissalerneqartarsimavoq. Tasiusami inuit pingasuugaangata ataaseq suli siullermeersumik kapitissimanngilaq.
Avannaata Kommuniani inuit 6.665-it siullermeersumik kapitissimapput, 4.109-llu tamakkiisumik akiuussutissalerneqarsimallutik. Naatsorsueqqissaartarfik naapertorlugu, Avannaani innuttaasut katillutik 10.820-upput.
Innuttaasut siullermik kapitissimasut amerlassusaat innutaasullu amerlassusaat:
Siullermik kapitissimasut - Innuttaasut
Avannaata Kommunia: 6.665 - 10.820
Kommuni Qeqertalik: 3.866 - 6.312
Qeqqata Kommunia: 5.532 - 9.305
Komm. Sermersooq: 15.104 - 23.462
Kommuni Kujalleq: 4.076 - 6.454
Kommunini tallimaasuni innuttaasut amerlassusaat pillugit kisitsisit Naatsorsueqqissaartarfimmeersuupput.
16-ileereersimasut tamarmik akiuussutissalerneqarnissamut neqeroorfigineqarput, nunamilu tamarmi innuttaasut katillugit 42.507-it matumani pineqarlutik. Taamaalilluni innuttaasut tallimararterutaat inulaarlugit suli akiuussutissalerneqarsimanngillat.
Kommunini tallimaasuni akiuussutissalerneqarsimasut amerlassusaat uani takukkit, akiuussutissalertissimasullu amerlassusaat malinnaaffigalugit.