Inuit 1000-it sinnillit akerliunerminnik takutitsillutik atsioqataareerput

Eqimattaq "Naammaleqaaq! - Nok er nok!" nittartakkakkut atsiorninik katersipput. Inuit 1000-it sinneqartut atsioreersimapput.

Eqimattaq ”Naammaleqaaq! – Nok er nok!” sisamanngornermi novemberip 21-ani atsiornernik katersillutik aallartipput, inuillu 1000-it sinneqartut Naalakkersuisunut naammagiliinertik takutinniarlugit atsioreersimapput.

Allaaserisap suliarinerani takuneqarsinnaavoq inuit 1.324-it atsioreersimasut, atsiortulli ullut tamaasa amerliartorput.

- Naalakkersuisut innuttat avaqqullugit aalajangiisarneri unittariaqarpoq! Naligaluta sullinneqartariaqarpugut, atsiornernik katersinerup nassuiaataani allassimavoq.

- Napparsimaveqarfiit, meeqqat, meeqqanik sullissisut, inissaaleqisut allallu siulliunneqartariaqarput, (Naalakkersuisullu, aaqq.) namminerlu pisariaqartitaat kingulliunneqarlutik. Inuinuku sullinniarlugit Naalakkersuisuusut, nangilluni allassimavoq.

Akitsuutit

Ilaatigut sukkut, imigassat aalakoornartutaqartut tupallu akitsuutaasa qaffanneqarnerat, aammalu puussiat pisiniutit plastikkiusut neqeroorutillu naqitat akitsuuserneqarnerisa kinguneranik, innuttaasut Naalakkersuisunut naammagiliinerat sipporneqarpoq.

- Nunarput aqunneqarnera naammagilerparput! Akitsuutit inuiaat akissakinnerit akunnattumillu isertitallit eqqorneqarput - tamannalu akuerisinnaanngilarput! Aqutseriuseq allanngornissaa piumasaralugu una atsiortitsinerup siunertarivaa, akerliunerminnik takutitsisut atsiornernik katersinerminni nassuiaateqarput.

Akerliunerminnik takutitsiniarlutik aaqqissuisut sapaatip akunnerani kingullermi akerliussutsimik takutitsinernik aaqqissuimmata, nuna tamakkerlugu innuttaasut 2.000-it missaat, Naalakkersuisut aalajangertagaannut naammaginnginnertik takutinniarlugu peqataapput. Ilaatigut Nuummi, Aasianni, Narsami, Paamiuni Sisimiunilu akerliussutsimik takutitsisoqarpoq.

Eqimattaq ”Naammaleqaaq! – Nok er nok!” Facebookimi 2.896-inik ilaasortaqarpoq. Naalakkersuisullu sulinerannut naammaginnikkunnaarlutik Nuummi ualimut 16:30 akerliussutsimut takutitseqqittoqarnissaanut innuttaasut 400-t sinneqartut peqataassallutik soqutiginnillutilluunniit nalunaarsimapput.

Københavnimi 20:30 aamma Qasigianngunia akerliussutsimik aamma takutitsisoqassaaq.

Powered by Labrador CMS