Tasiilaq
Inuit 100-t sinneqartut qulimiguulimmik ajornartoortoqarmat ingerlaqqinnaveerput
Air Greenland pingasunngormat Tasiilami qulimiguulimmik teknikkikkut ajutoorpoq
Pingasunngormat marsip 16-ani Air Greenlandi Bell 212-iminik Tasiilami teknikkikkut ajoquteqalertoornerata kingorna, ilaasut 100-t sinneqartut aamma nassiussat 4,3 tonsit apuuffissaminnut suli apuutinngillat.
Tamatuma kinguninngua kingoraartissaq Kulusummut tikippoq, tassanili timmisartortitseqatigiiffiup taanna apuunnissaa sulissutigilerpaa.
Narsarsuarmit
- Qulimiguulik Narsarsuarmiittoq Kulusummut ingerlasussavoq, taassuma kingoraartissaq aamma inuttat Tasiilamukaatissavai. Kujataanili silap angalanissamut pilersaarut tamaat ulluni kingullerni kinguaattoortippaa.
Atuaruk: Air Greenlandimi ilaasut sapaatip-akunnerinik pingasunik kinguaattoortut
- Silalu aamma ullumikkut killiliissaaq, kisianni aqagumut angalanissamik pilersaarusiortoqarpoq, Air Greenlandip paasissutissiinermut atorfilittaat, Katrine Hjelholt Nathanielsen ilisimatitsivoq.
Miffissat allanngorartut
Timmisartortitseqatigiiffiup aamma Twin Otterimik kingoraartissat Islandimit assartorneqarnissaanut periarfissat misissorsimavaat. Kisianni imaq aamma piffimmi siku allanngorarpallaarpoq, taanna ilisimatitsivoq.
Qulimiguulik Ittoqqortoormiinit kujammut timmisartuunneqarsinnaanersoq, Air Greenlandip aamma misissorsimavaa, kisianni tassani isorartuumi sila aamma killiliivoq.