Inuiattut Ullorsiortinnata akiuussutissalertinnissamut neqeroorfigineqassaq naatsorsuutigineqarpoq
Nunatta Nakorsaaneqarfianit naatsorsuutigineqarpoq Kalaallit Nunaanni innuttaasut 16-ileereersimasut coronavirusimut akiuussutissamik 21. juni Inuiattut Ullorsiornissaq sioqqullugu kapitinnissamik neqeroorfigineqareersimassasut.
Kalaallit Nunaanni coronavirusimut akiuussutissamik kapuinissamut pilersaarut ingerlalluarpoq. Akiuussutissallu Danmarkimiit tikiussorneqartut maannakkutut ingerlaannassappata, Kalaallit Nunaanni innuttaasut coronavirusimut akiuussutissamik kapitinnissamut Inuiattut Ullorsiorneq nallertinnagu neqeroorfigineqareersimassapput.
Nunatta nakorsaanera Henrik L. Hansen Sermitsiaq.AG-mut taama ilisimatitsivoq.
- Innuttaasut 16-ileereersimasut tamakkerlugit Inuiattut Ullorsiortinnata neqeroorfigineqareersimanissaat piviusorsiorsinnaavoq. Tassa 21. juni nallertinnagu, Henrik L. Hansen oqarpoq.
Akiuussutissat Danmarkimut tikiussuunneqarneratut sukkatigisumik Kalaallit Nunaat aamma pissarsisarpoq. Danmarkimi innuttaasut tamakkerlutik 1. julip missaani akiuussutissalereersimanissaat naatsorsuutigineqartoq, Kalaallit Nunaat siulliulaarluni naammassissasorivoq.
- Nunatsinnut nassiussorneqartut maanna ingerlalluarput. Nassiussuunneqartussallu pilersaarutit malillugit ingerlanissaat naatsorsuutigaarput, nakorsaaneq oqarpoq.
44.000-it neqeroorfigineqassapput
Nunatta Nakorsaaneqarfia ilisimatitsivoq innuttaasut 16-ileereersimasut katillugit 44.000-it akiuussutissalertinnissamut neqeroorfigineqassasut. Maannamut innuttaasut 3.655-it ataasiarlutik kapitereersimapput, 1187-illu aappassaanik kapitereersimallutik.
Qeqertarsuatsiaanni innuttaasut 16-ileereersimasut coronavirusimut akiuussutissamik kapitinnissamik ippassaq neqeroorfigineqarput.
Siunissaq nalorninartulik
Nakorsaaneq Henrik L. Hansen oqaluttuarpoq siunissap qanoq ikkumaarnissaa oqaatigiuminaattoq.
- Qaammatit sisamat qaangiuppata, akiuussutissamik kapitinnissamut innuttaasut neqeroorfigineqareerpata, naluarput pissutsit qanoq ikkumaarnersut, oqarpoq tunngavilersuillunilu:
- Suli qularnartoqarpoq akiuussutissamik kapitissimasut allanut tunillaasinnaassanersut, aamma akiuussutissaq coronavirusimut allanngoriartortumut akiuussutissatut atorsinnaanersoq. Assersuutigalugu coronavirus tuluit nunaanneersoq Danmarkimi tunillaanerulerpoq, tunillatsissimasullu affaat sinnerlugit taassuminnga maanna tunillatsissimasarlutik. Taamaammat pissutsit allanngoriaannaapput, oqarpoq.