Inuiattut ullorsiorneq
Inuiattut ullorsiornerput qallunaat tusagassiorfiinit soqutigineqaqisoq
Kalaallit inuiattut ullorsiornerat 33-issaa nalliussineqarpoq. Ukioq mannalu ukioq immikkut ittuuvoq, tassa Danmarkimi ulloq pisortatigoortumik erfalasulerfinngormat
– Qallunaat tusagassiorfiisa soqutiginninnerat nuannersumik nalissaqarsimanngilaq. Ullaaralaannguaq TV2 sianerpoq paasiniarlugu Kalaallit Nunaanni kaffisoqatigiinnermi kaagit assigiinngitsut qassit sassaalliutigineqartarnersut.
Taamatut oqarpoq Københavnimi Kalaallit Illuutaanneersoq Søren Thalund.
Qallunaallu tusagassiorfiinit soqutiginninneq tamannaannaanngilaq.
Tusagassiorfiit amerlanerusut
Kingusinnerusukkummi DR2 Morgen tutsiuppoq, Erfalasorput tunuliaqutaralugu toqqaannartumik ilanngutassiorusuttoq, radioaviisilu aamma nalunaaqutaq 12.00 takkunniarluni nalunaarpoq.
– Aammalu DR Aftenshowet nalunaaqutaq 19.00 (qallunaat nalunaaqutaat malillugu) ilanngussaqarniarpoq, Søren Thalund paasissutissiivoq.
Ulloq imatut nalliussineqartarpoq
Inuiattut ullorsiorneq ukioq manna Kalaallit Illuutaanni nalliussineqaqqissaaq. Ukioq manna tassani pisussaq aamma immikkut ittuuvoq, tassami ministeriuneq Lars Løkke Rasmussen (V) avataanit qaaqqusatut illumi oqalugiassaaq, tamatumalu kingorna kaagerujussuaq qallunaat kalaallillu erfalasuannik pinnersaatilik sassaalliutigineqassaaq.
– Danmarki silagissamaarpoq. Kajumissutsiminnillu sulisut 20-t sinneqartut nalunaaqutaq 09.00-miit ulapilissapput, nalunaaqutarlu 16.00 kalaallit arsaattartut klubbiannit FC Nanoq-meersut takkutissapput nalliuttorsiortitsillutillu. Nuanneqaaq qallunaat tusagassiorfii, Kalaallit Nunaat pillugu oqaluttuat nuannersortaannik aamma takunnissinnaammata, Søren Thalund oqarpoq.