Skip to main content

Inuiattut ullorsiornermi sammisassarpassuit

Puisinniarneq, akeqanngitsumik assilitinneq erinarsoqatigiinnerlu - inuiattut ullorsiornermi nunami kommunit sammisassaqartitarpassuisa ilagiinnarpaat.

Ataasinngorpat Kalaallit Nunaanni inuiattut ullorsiorneq nalliussineqassaaq, ileqquusorlu malillugu kommunit aaqqissuussarpassuaqarsimapput.

Ilanngutassiami matumani avannaanniit kujammut sammisassaritinneqartut atuarneqarsinnaapput.

Avannaata Kommunia

Ukioq manna Avannaata Kommuniani inuiattut ullorsiorneq nunami tamarmik tv-kkut malinnaaffigineqarsinnaavoq, KNR_immi Ilulissani ullorsirneq toqqaannartumik aallakaatissavaa.

Illoqarfimmi ulloq Zionip Oqaluffiata eqqaani nal. arfineq-pingasunut aallartinneqassaaq, tassa erfalasoq amuneqassaaq. erinarsoqatigiit tusarnaartitsissapput borgmesterilu Palle Jeremiassen oqaaseqassalluni.

Taakku pereerpata nal. qulinut puiseqqaanniuttoqassaaq. Ullormi aaqqissuussarpassuaqarpoq, ullorlu naggaserlugu Kulturikkut Illorsuarmi Sermermiuni unnukkut arfineq-pingasuniit aqqarnup tungaanut aliikkusersusoqassalluni.

Ilulissani sammisassaqartitsinerit linki una atorlugu takusinnaavatit.

Kommuni Qeqertalik

Borgmesteri Ane Hansen Qasigiannguani inuiattut ullorsiornermut peqataassaaq, Qasigiannguanilu pisussat kommunip Facebookikkut tamanut saqqummiussimavai.

Qasigiannguani aaqqissuussat ulloq naallugu ingerlanneqassapput, soorlu grillerisoqassaaq ullup-qeqqasiortoqassallunilu aamma allunaasamik noqqoruuttoqarlunilu poorsuarnut ikilluni arpaliuttoqassaaq.

Meeqqat inersimasullu arpatsinneqassapput, ullorlu naggaserlugu Umiarsualivitoqqami sammisassaqartitsisoqassalluni. Kommunimit oqaatigineqarpoq, illoqarfinni nunaqarfinnilu allani pisussat kommunip nittartagaatigut takuneqarsinnaasut.

Qeqqata Kommunia

Qeqqata Kommuniani inuattut ullorsiorneq aamma arlalitsigut aaqqissuunneqarsimavoq, ullormilu pisussat kommunip nittartagaatigut takuneqarsinnaallutik.

Maniitsumi kommuni ilaatigut ualikkut pannakaallissaaq, aamma kaagiliornermi unammisitsisoqassaaq, tassani ajugaasut Hotel Maniitsumut neriartortinneqassallutik.

Maniitsumi ualikkut aamma Elisabeth Petrussen tivanermik takutitsissaaq, kingusinnerulaartukkullu nipilersornermik ilinniarfimmi atuartut aliikkusersuissallutik.

Kommuneqarfik Sermersooq

Illoqarfiit pingaarnersaata kommuniani ileqquusoq malillugu ullaakkut arfineq-pingasunut Nuutoqqamiit puiseqqaanniuttoqassaaq:

- Naalakkersuisut Issittumilu Sakkutooqarfik puiseqqaanniunneq aallarnerlugu qamutilittassapput, piniartut taamaalillutik unamminissaat seqqorpallannersuarmit aallartinneqassalluni, kommuni nittartakkamigut oqaluttuarpoq.

Qamutilittartoqareerpat erinarsortartoqatigiit tusarnaartitsissapput, taakkulu pereerpata borgmesteri Charlottq Ludvigsen (IA) oqaaseqassalluni.

Nal. qulinut assiliisoqassaaq, tassani inuiaat assuutaannik atortut tamarmik Annaasisitta Oqaluffiata saavani assilisissallutik, aamma inuussutissarsiutigalugu assiliisartumit akeqanngitsumik assilitittoqarsinaassaaq. Assit kommunip Facebookiatigut tamanut saqqummiunneqassapput, tassanngaanni assit aaneqarsinnaapput.

Kommuni Kujalleq

Kommuip Qaqortumi, Narsami Nanortalimmilu pisussat tamanut saqqummiussimavai.

Qaqortumi ulloq aallarnerlugu Erfalasorput amuneqassaaq, borgmesteri Stine Egede (IA) oqaaseqassaaq naalagiaqatigiittoqarlunilu.

Tamakkut pereerpata puiseqqaanniunneq aallartinneqassaaq, aqqanerniillu grillerisoqassalluni, tassani nammineq nerisassanik nassartoqarsinnaavoq imaluunniit puiseqqaanniuttunit neqimik pissarsisoqarsinnaalluni.

Unnukkut nipilersortoqassaaq, ullorlu naggaserlugu unnuap-qeqqanut qummoroortartortoqassalluni. 

Illoqarfinni pingasuni pineqartuni pisussat Kommuni Kujalliup Facebookiatigut takuneqarsinaapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER