Inuiattut ullorsiorneq

Inuiattut ullorsiorneq tassaarsuaqarnerup tarraani: Ataatsimuussaagut

Inuiattut ullorsiornerput ullumikkut nalliuttorsiutigineqarpoq. Ukiumoortumik inuiattut kinaassutsimut aamma ileqquusunut tulluusimaarutigisanut nersuineq. Inuiattut ullorsiorneq ukioq manna Uummannap Kangerluani tassaarsuarmit sunnerteqqaffiusoq. Pisoq ulluni kingullerni Nunatsinni ataatsimoortitsiffiusoq. Nuutoqqamilu Nuummi ullumi taamatorpiaq pipput.

Nuummi aqqusinikkut ullaap tungaani ingerlaaraanni, Erfalasorput qilammik nuiaqanngitsumik tungutsorissumik tunuliaquteqarluni erfalavoq. Erfalasorput juunip 21-anni ukiut tamaasa nuna tamakkerlugu amuneqartarnera iloqquuvoq. Namminersornerullutik Oqartussat 1983-imili ulloq nalliuttorsiorfittut eqqunneraniilli tamanna taamaattuarsimavoq, inuiattut kinaassuseq nalliuttorsiutigalugu. Kisianni ukiormanna allaanerussuteqangaatsiarpoq.

Erfalasoq qummut tamakkerlugu amuneqanngilaq. Illuanik illoqarfiup erfalasulerfiini qiteqqusimavoq. Naalakkersuisut ullumikkut nunaqarfimmi innuttaasut sapaatip-akunnerata naanerani Uummannap Kangerluani tassaarsuarmut eqqugaasut misiginneqatiginiarlugit inassuteqarmata taamaaliortoqarpoq.

Nuutoqqami minutsi ataaseq nipaallisimaneq
Ullaaq nalunaaqutaq 8.00 inuppassuit Nuummi Nuutoqqami inuiattut ullorsiorneq aallartinniarlugu katersuussimapput. Uummannap eqqaani ajunaarnersuarmut eqqugaasunut minutsimik ataatsimik nipaallisimanermik tamanna aallartinneqarpoq.

Ajunaarnersuaq inersimasut pingasut meeraaqqallu inuuneranik naleqartitsisimassangatinnerpoq.

Oqalugiarneq oqimaatsortalik
Borgmesterip sinniisuata Nivi Olsenip oqalugiarnerani ajunaarnersuaq oqimaatsumik tunuliaqutaavoq, taassuma borgmesteri Asii Chemnitz Narup ullumi Danmarkimiittoq taarserpaa.

- Nunarput pinnersorsuaq inuuffigaarput. Aammali peqqarniissinnaasarpoq ilaatigut inuup inuuneranik naleqartarluni. Tamannalu nunaqqatitta Uummannap Sulluani najugallit tamarmik qanittukkut misigisaqarfigaat. Karrata Kangerluani innaarsuup nakkaanerata kingorna tassaarsuaqarmat, Nuugaatsiarmiut sisamat maqaasineqalerput arlallillu aqqunartiterlutik. Maqaasineqartut ilaqutaat Uummannallu Sulluarmiut tamaviisa qamuuna misiginneqatigigaarpavut, Nivi Olsen oqarpoq.

- Nunatta pinngortitarsua inuunermik tunisisuusarpoq tigusisuusinnaasarlunilu. Tamannalu uangut kalaaliusugut akueralugu inooqataaffigaarput – pinngortitarsuup massuma qanoq innera aallaavigalugu Kalaallit Nunarput inuuffigaarput – taamaattuassallutalu.

Piffissami artorsarfiusumi ataatsimoortoqartassaaq
Inuiattut ullorsiornermi inuiaqatigiit ataatsimoornissaat, ingammik piffissami artorsarfiusumi borgmesterip sinniisuata oqalugiarnermini eqqaasitsissutiginissaa pingaartippaa.

- Nunarput inuuffigiuminassappat ullullu atoruminartut aqqusaartuassagutsigit ataatsimoorneq ikioqatigiinnerlu pisariaqarput. Tassami ikioqatigiinneq ataatsimoorneruvoq nukittooq – pisuussuserput, ilaqutariiussuserput , illoqarfimmiuugutta nunaqarfimmiuuguttalu ataqatigiissuserput aamma naalagaaffinnut allanut ikinngutinnersuunitsinni ataqatigiissuserputy nukittoqutigissallutigu, Nivi Olsen oqalugiarfimmit aqqannginnermini oqarpoq.

Ullaaq manna Nuutoqqamut atertut ilagaat, naalakkersuisoq Sara Olsvig. Kalaallit inuiaqatigiit ulluni kingullerni ajunaarnersuarmut qisuariaatigisaat qanoq attortisimaarfigitiginerlugu taassuma oqaluttuaraa.

Ataatsimoornerput takutissavarput
- Inuiattut ullorsiorneq Nunatsinni pingaartinneqartuaannarpoq. Ullumikkullu aamma ingammik Uummannap Sulluani ajunaarnersuarmik nalaataqarsimanitsinni pingaarneruvoq. Ullormi maani ajunaarnersuarmut eqqugaasunut erfalasut qiteqqusimanissaannik inassuteqarpugut, ataatsimoornerput takutinnissaa pingaaruteqarmat. Ataatsimoornermik takutitsinerput nukittunitsinnik takutitsineruvoq. Ajunaarnersuarmullu atatillugu assut tamanna attortissutigaara: Inuit taakku ikiorniarlugit nunarput ataatsimoortoq, Sara Olsvig Sermitsiaq.AG-mut oqaluttuarpoq.

- Nunarput ajunaarnersuarnut eqqorneqarsinnaavoq, tassa taamaappoq. Issittumi avatangiiseqarluta inuuvugut, qanoq pisoqaraluarpalluunniit tunniutiinnassanngilagut. Taamaaliornikkullu ullumikkut ataatsimoornitsigut nukittunerput takusissavarput, naalakkersuisoq malunnartumik sunnertisimasoq oqarpoq.

Inuiattut ullorsiornerit nunap sinneranut takutikkusukkukku, taava assiutitit redaktion@sermitsiaq.ag-mut nassiutikkit. Ullup ingerlanerani assiutisi nittartakkamut ikkutissavagut.

Inuiattut ullorsiornitsinni assilisasi

Powered by Labrador CMS