Inuiattut ullorsiorneq Odensemi nalliussineqarmat erinarsoqatigiit tusarnaartitsipput folketingimilu ilaasortaq oqaaseqarluni
Inuiattut ullorsiorneq Odensemiittumi Nordatlantisk Husimi pisarnertut nalliussineqarpoq, tassani erfalasorput amuneqarpoq, Erinarsoqatigiit Umiaq tusarnaartitsivoq, oqalugiartoqarpoq aliikkusersuisoqarlunilu.
Inuit 300-t 400-llu akornanniittut marlunngornermi Kalaallit Nunaanni Inuiattut ullorsiorneq nalliussiniarlugu Odensep umiarsualivianiissimapput. Inuppassuit ungasissumiit, soorlu Esbjergimiit, Koldingimiit Vejlemiillu bussinik marlunnik Odensemukaanneqarsimapput.
Amerlaqisut salliarnartami silagissiorluarsimapput.
Ileqquusoq malillugu Royal Greenlandip aningaasaligaanik kalaaliminertuuttoqarpoq. Tamanna nuannarineqartaqaaq, aamma soorunami kaffisuullutillu kaagisuussimapput.
Erinarsoqatigiit Umiaq ullormi ulapissimapput. Silami illullu iluani tusarnaartitsisimallutik. Ersinarsuutit tusarnersut arlalinnit qullilisitsisimapput.
Folketingimi ilaasortaq oqaaseqartoq
Odensemi Kalaallit Illuanni siulittaasoq Benny Nybo oqaaseqarpoq. Odensemi borgmesterip tullia Andreas Munch Møller aamma folketingimi ilaasortaq Aki-Matilda Høegh-Dam oqaaseqarput.
Folketingimi ilaasortap oqaaseqarnermini, soorunami Kalaallit Nunaata Danmarkillu akornanni ullumikkut pissutsit ilanngullugit oqaaseqarfigai.
Aliikkusersuisuupput Mike Thomsen aamma Christian Søgaards Trio Ulf Fleischerimik peqateqarlutik kiisalu Erinarsoqatigiit Umiaq.
Inuiattut ullorsiornerup nalliussineqarnera unnukkut nanginneqarpoq, tassani peqatigiiffik Umiaq nereqartigiissitsilluni.