Inuiaqatigiilerinermik ilisimatooq: Tunngaviusumik inatsisissamik suliaqarneq kinguaattooqqissinnaavoq

Tunngaviusumik Inatisissaq pillugu Isumaqalioqatigiissitaq suliaminik kinguaattooqqissaguni politikkikkut oqallisigineqaqqillunilu isumaqatigiinngissutaaqqilersinnaavoq. Isumalioqatigiissitap suliaqarnera kinguaattootareerpoq, kingullermik coronamut atatillugu killilersuisnerit pissutaallutik kinguaattoorsimavoq.

Tunngaviusumik Inatsisissaq pillugu Isumalioqatigiissitamut suliakkiissummi allassimavoq, arfineq-marlunnik ilaasortaqassasoq. Ilaasortat arfineq-marluunissaannut pissutaannguatsiarpoq, isumalioqatigiissitamut malittarisassat aalajangersarneqarmata partiit Inatsisartuni issiatitaqartut qanoq amerlatiginerat.

Partiit marluk nalorninartortaqartut

Partiilli marluk, tassaasut Suleqatigiissitsisut aamma Nunatta Qitornai kingullermik qinersisoqarnissaanik nalunaaruteqartoqarnissaa sioqqullugu isumasiuisoqarsimanera upperissagaanni, Inatsisartunut isernissamut naammattunik qinerneqassanersut nalorninartinneqarpoq.

Qinersinermi partiit tallimaannaat arfiniliinnaalluunniit Inatsisartuni issiatitaqalissappata, Isumalioqatigiissitami kikkut ilaasortaatinneqassanersut pillugu politikkikkut oqallittoqaqqilersinnaavoq.

- Suliakkiissutissaq suliarineqarmat sulinerup kinguaattoorsinnaanerata aamma piffissaanngitsukkut qinersisoqarnissaanik nalunaaruteqartoqarsinnaanerata eqqarsaatigineqarsimannginnerat erseqqippoq, Ilisimatusarfimmi inuiaqatigiilerinermik ilisimatooq Birger Poppel erseqqissaavoq.

- Qinersisoqareernerani partiit amerlassusaat allannguuteqassappat, suliakkiissummik qanoq naammassinnittoqarsinnaanera politikkikkut nalornartinneqalersinnaavoq, Birger Poppel, Siumumi siulittaasup Erik Jensenip isumalioqatigiissitap tunngaviusumik inatsisissatut siunnersuutaa 2023-mi innuttaasunut taasissutigitinneqarnissaa pillugu oqaaseqarsimaneranik tikkuussisoq oqarpoq.

- Eri Jensenip taamatut nalunaaruteqarsimanera tunngavigalugu kikkut isumalioqatigiissitami ilaasortaassanersut politikkikkut sammineqaqqilersinnaavoq.

Qanoq paasineqarsinnaanersoq

Suliakkiissummi allassimavoq: "Tunngaviusumik Inatsisissaq pillugu Isumalioqatigiissitaq arfineq-marlunnik ilaasortaatitaqassaaq, ilaasortat kingullermik Inatsisartunut qinersisoqarmat partiinit isertunit inassuteqartoqarneratigut Naalakkersuisunit toqqarneqassapput."

Ilaasa immaqa taamatut oqaasertaliisimaneq, qinersineq qanorluunniit inerneqaraluarpat, aamma Inatsisartuni ilaasortaajunnaartoqaraluarpat partiit taakku arfineq-marluusut isumalioqatigiissitami ilaasortaatitaqaannarsinnaanerattut paasisimasinnaavaat.

- Apriilip arfernani Inatsisartunut qinersinermi partii ataaseq arlallilluunniit Inatsisartunut isertitaqanngippata, kikkut isumalioqatigiissitami ilaasortaassanersut qularutigineqaqqunagu suliakkiissutip erseqqinnerusumik oqaasertalerneqarsimannginnera ajornartorsiutaavoq, Birger Poppel oqarpoq.

Siulittaasutut atuuffik

Siulittaasutut atuuffik Ineqi Kielsenip Siumumeersut issiavigisaa, isumasiuisimanerit arlallit malillugit IA Siumumit taaguunneqarussagaluarpat aamma allanngortinneqarsinnaavoq. Suliakkiissummimi allassimavoq, siulittaasutut atuuffik inuttaqartinneqassasoq partiit annersaannit toqqarneqarsimasumik. Partiit annersaasa tullianit siulittaasup tullia inuttalerneqarsinnaavoq.

Ullumikkut Naalakkersuisunut Siulittaasuusimasoq Kuupik Kleist IA-meersoq siulittaasup tulleraa.