Inuiaqatigiilerinermik ilisimatooq: Politikkerit oqallinnermi sakkortuumik oqaluttoqartarneranut akisussaapput
Birger Poppelip politikkikkut sakkortuumik oqalliseriaaseq Justus Hansenip oqaatigisimasaa ilisarisinnaavaa. Taanna isumaqarpoq naalakkersuisoqatigiit iluminni akerleriissuteqartarnerat pissutaasut ilagigaat.
Politikkikkut misilittagartuup Justus Hansenip (D) ukiaq manna Inatsisartuni oqalliseriaaseq sakkortulluinnartoq misigisimavaa.
- Inatsisartut ataatsimiittarfianni inunnut sammititanik peqqarniitsumillu aatsaat taamak sakkortutigisumik pissusilersortoqartoq misigivara. Imminut aperisariaqarsimavunga, politkkeriuinnarnissaq imminut akilersinnaanersoq, taanna oqarpoq.
Ilisimatusarfimmi Inuiaqatigiilerinermik ilisimatuup Birger Poppelip sakkortuumik oqaluttoqartarnera ilisarilluarsinnaavaa.
- Inatsisartut siulittaasuata arlaleriarluni ilaasortat eqqissisartarsimavai. Tamatuma takutippaa oqalliseriaaseq sakkortusisimasoq imaluunniit ileqqorissaarpallaartoqarunnaarsimasoq, taanna Sermitsiaq.AG-mut oqarpoq.
Justus Hansen (D) aamma oqaluttuarpoq, aqqusinermi nilliaffigitittarneq inuillu attaveqaqatigiittarfiisigut akerartorneqartarneq misigisarlugu. Tassungali atatillugu Birger Poppel isumaqarpoq, tamanna politikkerimut namminermut toqqaannartumik tunngassuteqartoq.
- Politikkerit akornanni oqallinneq sakkortusigaangat ilaannikkullu sakkortusivallaaraangat inuiaqatigiit oqallseriaasiannut sunniuteqartarpoq, minnerunngitsumik inuit attaveqaqatigiittarfiisigut oqallinnermut sunniuteqartarpoq. Tassa politikkerit pitsaasumik oqallittoqarnissaanut namminneerlutik akisussaaffeqarput annertuumik. Tassungalumi atatillugu eqqarsarnarpoq, politikkerit ilaasa nammineq sakkortuumik oqaaseqarsinnaasup politikkerit oqalliseriaasiannik qaqitsinera.
Birger Poppelilli erseqqissaatigaa, inuit attaveqaqatigiittarfiisigut sakkortuumik oqalliseriaaseqarneq Kalaallit unaanni kisimi atuutinngitsoq.
Aningaasanut inatsit akitsuutillu
Taanna politikkerit sakkortuumik oqallittarnerannut tunngatillugu isumaqarpoq, politikkikkut maanna inississimaffik tamatumunnga pissutaaqataasoq.
- Isumaqarpunga sakkortuumik oqallittoqartarnera arlalinnik nassuiaatissartaqartoq. Partiit arlallit Inatsisartuni sulinerup suleqatigiiffiunnginnera naammagisimanngilaat. Suleqatigiittoqannginnera pakatsiffiusarsimaqaaq. Aningaasanut inatsisissaq suliarineqarmat akitsuutillu qaffanneqarmata naammaginninngitsorpassuupput, tamannalumi innuttaasut akerliussutsimik takutitsinermikkut ersersippaat.
Iluminni aaqqiagiinngissuteqartartut
Inuiaqatigiilerinermik ilisimatooq naapertorlugu, ikinnerussuteqartumik naalakkersuisuutitaqarneq Kalaallit Nunaanni sungiussimanngisaq kiisalu Siumumi aaqqiagiinngissuteqartuartoqarnera politikkikkut sakkortuumik oqallittarnermut pissutaaqataalluinnarput.
- Siumumi akerleeriissutaasartut partiimit ikorfartortiusumit Demokraatinit tatisinermik ilallit Naalakkersuisut iluanni aamma naalakkersuisooqatigiit partiillu ikorfartortaasup akornanni aaqqiagiinngissuteqartitsilersinnaapput. Siumumi aaqqiagiinngissuteqartoqartarnera siusinnerusukkkut takusareeraluarlutigu, ukiaq manna Inatsisartuni ilaasortat arfinillit naalakkersuisorlu ataaseq Kim Kielsenimut tatiginnikkunnaarlutik nalunaaruteqarnerat qaqutigoortuuvoq. Aappaatigut tupinnaannangajapporluunniit tassunga atatillugu imatut kinguneqartitsisoqannginnera.
Naalakkersuisut imminnut sullittut
Tamatuma kinguneranik illuatungiliuttut misigisimapput peqataatinneqaratik. Tamannalumi arlaleriarlutik erseqqissaatigisarsimavaat.
- Naalakkersuisut nukippassuit atorlugit naalakkersuisuutitaminnik attassiniarsimapput, taamaammat siammasinnerusumik suleqatigiittoqarnissaanut periarfissaqarpallaartoqarsimanngilaq. Tamannalumi aamma illuatungiliuttut sakkortuumik qisuariarfigisarsimavaat, illuatungiliuttut misigisimagamik Naalakkersuisut Demokraatinit tapersersorteqarlutik matoqqasumik ingerlatsinerminni aalajangiisartut, naak tunngavilersuutit immaqa tamatigut tulluarpallaartanngikkaluartut aamma tunngavissat kinguneqaatissallu tamatigut erseqqissaatigineqarneq ajoraluartut.
- Kingullertut taaneqaqrtumut tunngatillugu assersuutigisinnaavarput akitsuutit pillugit oqallinneq, tassani innuttaasut peqqinnerulernissaat tunngavilersuutigineqarpoq, uffa aningaasanut inatsisip amigartooruteqarnissaa matussuserniarlugu iliuuseqarlutik. Inuimmi peqqinnanngitsutortarnertik appartikkaluarpassulluunniit Nunatta Karsia aningaasanik amigaateqartussaavoq, Birger Poppel taamatut naliliivoq.