Inuiaqatigiilerinermik ilisimatooq: Aki-Mathilda paasisinnaarpianngilara

Aki-Mathilda Høegh-Dam ukioq manna siornalu folketingimi aqqaniliinnarnik apeqquteqarsimasoq, suleqatigisimanit IA-meersumit Aaja Cheminitz Larsenimit piffissami pineqartumi 217-inik apeqquteqarsimasumit suliakinnerusimaqaaq. Sermitsiaq.AG-p martsip 25-ani naatsorsuisimanerata tamanna takutippaa.

Politikkerit taakku marluullutik sooq taamak amerlatigisunik apeqquteqartariaqarsimaneq aamma sooq 217-inik apeqqutartariaqarsimaneq nassuiaateqarfigivaat.

Ilangutassiaq atuaruk: Aajap Aki-Mathildallu politikkikkut sulinerat assigiinngissuteqartupilussuusoq

- Naatsorsuinerup qanoq sulisartiginersut aamma politikkikkut sulinerminni piffissamik qanoq annertutigisumik atuisarsimanersut takutinngilaa. Danmarkimili naalakkersuisuni ministerinut apeqqutigineqartartut pingaarutilimmik siunertaqartarnerat qularutissaanngilaq, Birger Popperl erseqqissaavoq, nassuiaatigalugulu:

Uppernarsaatit

- Politikkikkut sammisat Kalaallit Nunaanni innuttaasunut pingaaruteqartut apeqquteqartarnikkut qinersisartunut kikkunnullu tamanut uppernarsarneqartarput. Ministerit akissutigisartagaat aamma qinersisartunut folketingimi ilaasortaatitatsinnut apeqquteqarsimasunut uppernarsaataasinnaapput, inuiaqatigiilerinermik ilisimatooq nassuiaavoq.

Aki-Matilda Høegh-Damip apeqquteqarpallaarsimannginnerminut nassuiaatigisimavaa, socialdemokraatit gruppiannut ilaanini, tamannalu aqqutigalugu socialdemokraatit sinnerlugit ministerinut attaveqarsinnaanini apeqqutigisaminullu akissutissarsisinnaanini.

- Aki-Mathilda Høegh-Damip ataatsimiinnerni pineqartuni ministerinik attaveqartarnera qularnanngilaq. Paasissutissalli allanut isertuutassanngorlugit tunniunneqarsinnaapput, taakkulu qinersisartuminut innuttaasullu sinnerinut atorsinnaasassanngilai, Birger Poppel ersqqissaavoq, oqarlunilu paasissutissanik nassuiaassuteqarnissamut ingerlatitseqqinnissamullu piffissamik atuisariaqartassasoq. Ministeri allakkatigut akissuteqarpat suliaq naammassineqariissaaq.

Paasisinnaanngikkaa

Birger Poppel isumaqarpoq, Aaja Chemnitz Larsen apeqquterpassuaqarsimanermigut saqqumilaarnerullunilu Danmarkimi politikkikkut suliaqartartut eqqumaffigitinnerusarai.

- Aap taamaammallu Aki-Mathilda Høegh-Damip suleriaasia paasiuminaatsippara, politikikkummi suliaqartarnimi pingaaruteqassusia uppernarsaruminaatsissagamiuk, Birger Poppel oqarpoq.