Inu-Art kalaallit assuutaattut isikkulinnik kjoliliorsimasoq
Inu-Artimi ilusilersuisartut kalaallit assuutaat isumassarsiorfigalugit kjoliliorlutillu atequsiorsimapput.
Internetsikkut pisiniarfimmi Inu-Artimi ilusilersuisartut nutaanik kjoliliornerminni atequsiornerminnilu kalaallit assuutaasa kamittai isumassarsiorfigalugit suliaqarsimapput.
Ulluni kingullerni tamanna inuit attaveqaqatigiittarfiisigut oqallisigineqarsimaqaaq, amerlanerit nutaaliorlutik ilusilersuisartut nersulaarpaat, allalli isumaqarput kjolit kamittut isikkulinnik sanaajusut qangaaniit assuutigineqartartunik nikassaanerusut.
- Kjoliliavut pillugit kusananngitsumik oqaaseqartoqarsinnaanera piareersimaffigisimavarput. Oqaaseqaatigineqartut inuttut tigusimanngilavut, isummat anninneqartut tamarmik inissaqartinneqartussaammata, Piitannguaq Naujalu Inu-Artimeersut Sermitsiaq.AG-mut oqarput.
Oqallittoqaleruttorli Inui-Artimut pisiniartoqarluarsimasoq, ilusilersuisartut innuttaasunit toqqaannartumik attaveqarfigineqartarnissartik ernumassutigingamikku naggatitik saqqummiukkusunnagit oqaluttuarput.
Isumassarsiortarsimasut
Inu-Artimik piginnittut ukiuni arlalinngortuni isumassarsiortarsiapput. Isumassarsiallu malillugit aatsaat massakkut kjoliliorlutillu atequsiorsimallutik. Taakku oqaluttuaraat, kalaallit assuutaannik ataqqinninneq assuutillu allaqartarnerat atuutsiinnarusunneqarnerat suliamik naammassinninniarnermut tunngaviusimasoq:
- Kalaallit assuutaat kusanartut assigiinngitsutigut allalersorneqarsinnaapput. Kalaallit assuutaat ataqqisarilluinnarpavut ataqqillugillu atortarlugit. Isumaqarpugulli kalaallit assuutaannik akisuunik peqanngikkaanni allatutu isikkulinnik assuuteqarsinnaaneq ajunngitsuusoq, taakku oqarput.
Kjolit hoodiet atequtillu maannamuugallartoq tuniniarneqarput. Inu-Artimit ilisimatitsissutigineqarpoq, kjolit amerlanerit qanittukkut pisiarineqarsinnaalissasut.
Kalaallit assuutaat aatsaat siullermeersumik isumassarsiorfigineqanngillat. 2009-mi skuut kimmikkaajut nutaalianik takutitsisarfinni takutinneqarput, tamanna oqallisigineqangaatsiarpoq, ilaatigut mamiatsassimasut nersorinnittullu qisuariaateqarsimallutik.