Interview: Hashimik eqqusseriarsimasutut eqqartuussaanermiit tusaamasatut ataqqisaalernermut

Maleruagassat, inatsisit politiitullu sulinissaq siunertaasimagaluarpoq, tamannali hashimut eqqartuussaanerup pisinnaajunnaarteriasaarpaa. Klaus Geisler Kalaallit Nunaanni isiginnaartitsisartut pikkorinnerpaat ullumikkut ilagaat aatsaallu taama nuannaartigaluni

Klausip nuliarisimasami erninngua kissumiartillugu ilitsersuisua sianerpoq.

- Klaus – issiavit? Reumertimik nersornaasigassatut innersuunneqarputit.

Isiginnaagassiami Angutivimmi ilitsersuisumi Hanne Trap Friisimi malunnarpoq pingaarluinnartumik pisoqalersoq, Klausilli tamanna soqutiginngilaa. Nukappiarannguaq kissumiakkani tiguartiffigisimaqaa, aammali nassuerutigiumanagu Reumert suunersoq nalugamiuk.

- Torrak, maannakkorpiarli oqalussinnaanngilanga, oqarpoq.

Persuarsiornartuusoq Klausip paasileraa

Danmarkimi aviisersuarni ullut tamaasa saqqummersartuni tusagassiortut aqaguani sianerfigisalermanni aatsaat paasilerpaa persuarsiornartuusimassasoq – Romert kinaanerpoq (Danmarkimi isiginnaagassiornermi nersornaasiuttakkat annersaat isiginnaartitsisartumut Poul Reumertimut atsiussaq kukkullugu taallugu).

Hanne Trap Friisip Klaus eqqaasittuarpaa nersornaaserneqassaguni qujaniarluni oqalugiaatissami allannissaa eqqaamassagaa, taamaaliorniarlunilu neriorsuivoq, taamaaliunngisaannarlunili. Naatsorsuutigisimanngilaa nersornaasiuttagaq taama ataqqinartigisoq kalaallinit isiginnaartitsisartunit siullersaalluni tigussallugu. Isiginnaartitsisartunili angutini isiginnaartitseqatigiinni pikkorinnerpaatut inuusaliannguaq isiginnaartitsisarfimmi tigummialeriasaaramiuk malaatiinnarlugu oqalugiartariaqarpoq.

- Romertimut qujanarujussuaq, oqarpoq.

Upernaaru angalaniartoq

Klaus Geisler Isiginnaartitsisartunngorniarfimmi ilinniartut siulliit 2014-imi naammassisut tallimat ilagaat. Isiginnaagassiaq Angutivik Reumertimik nersornaaserneqassutaa Kalaallit Nunaanni Danmarkimilu upernaamit angalaartinneqassaaq.

Klaus Geislerip ilisaritinneqarnera tamaat Arnanut aqqutigalugu atuaruk, ugguuna pisiarisinnaavat:

Powered by Labrador CMS