Internettikkut aarlerinartorsiorneq: Namminersorlutik Oqartussat isertortumik paasiniaasartunit ikiorneqartariaqarsimasut
Internettimi kilitsissiatut suliaqarnermit aarlerinartorsiortitsineq, ilaatigut Kalaallit Nunaannut, qaffasissorujussuusoq, Illersornissaqarfimmi Isertortumik Paasiniaasartoqarfimmi, FE, internettimi isumannaatsuutitsinissamik suliaqarfik Center for Cybersikkerhed, naliliivoq. FE aamma PET russit Kinamiullu kilitsissiatut suliaqartarnerinut piffissami sivitsortumi mianersoqqusisimapput.
Namminersorlutik Oqartussat qaammammi kingullermili internettikkut kilitsissiatut suliaqarfiginiarneqarlutik saassunneqarmatali kikkut tunuliaqutaanerannik, imaluunniit peqquserlullutik qarasaasiarsornikkut aqutsivinnut iserniartartut, hackerit, sumiissimanerannik, Namminersorlutik Oqartussat oqaluttuarusussimanngillat.
Aviisi Sermitsiaq taama allappoq.
Taamaattorli hackerit Namminersorlutik Oqartussat qarasaasiarsornikkut aqutsiveqarfiinik iserfiginninnerisigut, qarasaasiarsornerup unittoorutigisaanik, Namminersorlutik Oqartussani allagaatinik paasissutissanillu allanik pissarsiniarsimagaluarnerat saqqummiunneqarsimavoq.
Tusarfik kinaassutsiminik isertuussisoq ilisimasaqarluartoq naapertorlugu, aalisarsinnaanermut Akuersissutinik Nakkutilliisoqarfimmi, KANUAANA-mi, serveri ataaseq arlallilluunniit hackerinit saassunneqarsimapput. Paasissutissarli tamanna ilumoornersoq Sermitsiap Namminersorlutik Oqartussani uppernarsarneqartissinnaasimanngilaa.
Kalaallit Nunaata internettikkut kilitsissiatut suliaqarnermit eqqugaanera, Illersornissaqarfimmi Isertortumik Paasiniaasartut, FE-p, ataaniittup Center for Cybersikkerhedip, CFCS, Danmarkimut taamalu aamma Kalaallit Nunaannut internettikkut aarlerinartorsiortitsinermik naliliinermi kingullermi internettikkut pinerlunniarnissamut kilitsissiatullu suliaqarnissamut aarlerinaatip qaffasissorujussuuneranik allaaserisaanut naapertuulluinnarpoq.
Isumannaallisaanermik akornusiineq annikillisarniarlugu Namminersorlutik Oqartussat piffissap ilaani allaffeqarfimmi serverinut Kalaallit Nunaannut Kalaallit Nunaanniillu attuumassutilinnut attaveqarneq matuaat. Namminersorlutik Oqartussani qarasaasiarsornikkut aqutseriaatsip qaammatip ataasingajaap matuma siorna unioqqutitsilluni iserfigineqarnerata kingorna Namminersorlutik Oqartussani qarasaasialerinermik suliaqartut Kalaallit Nunaanni pisortaqarfiit annerpaartaat internettimut attaveqalerseqqissimavaat.
Taamaakkaluartorli Naalakkersuisut nittartagaat, Naalakkersuisut.gl, nittartakkamik utaqqiisaarutaagallartumik suli taarserneqarsimavoq, nittartagaq pioreersoq suli isumannarpallaarmat.
Aviisimi Sermiatsiami atuarnerusinnaavutit. Aviisi uani pissarsiariuk: