Internetikkut saassussinerit Naalagaaffiup iluani assigiinngissutsit annertusisinnaavai

Kalaallit Nunaanni Danmarkimilu assigiinngissutsit russit torulliliortarnerannit eqqugaasinnaapput, taakku naalagaaffiit kitaaniittut aaqqiagiinngissutaannik annertusaaniartarput. Illersornissamut ministeri Claus Hjort Frederiksen taama naliliivoq.

Leiff Josefsen

Walter Turnowsky

marlunngo 29. uki 2019 11:29

Annonse

Kalaallit Nunaata Danmarkillu akornanni ilaanni aaqqiagiinngitsoqartarnera, Ruslandimi torulliliorfittut taasartagaannit eqqorneqaratarsinnaavoq. Illersornissamut ministeri Claus Hjort Frederiksen (V) taama naliliivoq.

Torulliliorfiit nutaarsiassanik eqqunngitsunik, inuit nittartakkakkut attaveqarfigisagaatigut siaruarterisarput, taamaasillutik oqallinnernik sunniiniartarlutik. USA-mi Frankrigimilu præsidentinngorniunnerit taamatut sunnerneqarsimapput, russit nittartakkani attaveqatigiiffiusuni allaatiginnittartui nutaarsiassanik ilumuunngitsunik saqqummiinerisigut.

Russilli sunniiniartarnerat ineriartornermut aalajangersimasumut aallaaveqartanngilaq, nunat naalagaaffiit kitaaniittut akornanni aaqqiagiinnginnerit sakkortusarniarlugit ilumuunngitsunik nutaarsiassaliortarnernik assersuutissaqarpoq. Tassanerpiarlu naalagaaffeqatigiit sanngiiffeqarsinnaasut, Claus Hjort Frederiksen (V) isumaqarpoq.

Torulliliorfiit suuppat?

- Nittartakkami torulleq tassaavoq inuk, nittartakkami attaveqatigiittarfinni isummanik sakkortuunik oqqassaarutinillu saqqummiussisartoq aaqqiagiinngitsitsilertartorlu.

- Torulliliorfik sulisoqarpoq, aaqqiagiinngitsitsilernissaq anguniarlugu isummanik sakkortuunik, nutaarsiassanillu ilumuunngitsunik siammartiterisartunik.

- Russit torulliliorfiat ilisimaneqarnerpaaq tassaavoq Internet Research Agency, aamma Glavsetimik taaneqartartoq. Taanna Sankt Petersborgimiippoq. Suliffeqarfimmi 2015-imi inuit 1.000 sulisorineqartut ilimagineqarpoq.

- Sulisoq ataaseq ullormut ikinnerpaamik 50-inik isummersuutinik allattassaaq facebookimilu tallimanik ingerlataqartassalluni, ullormut ikinnerpaamik pingasoriarluni saqqummiussisassalluni.

- Anngiortumik sulisoqarneranut eqqoriaanerit amerlanertigut ingerlanneqartarput pilersinneqartarlutilluunniit.

- Botsinik taaneqartartut atorlugit facebookimi allaatigisat likerneqartorujuusarput, nittartakkami attaveqatigiiffinni qaffasissumik inissisimalersittarlugit. Suli siaruarnerutinniarlugit attaveqatigiittarfikkut allakkut, Twitterikkut, allatat siammartertarpaat.

Paasisaqarfik: Wikipedia.

- Assersuusiortoqarsinnaavoq torulliliorfiit Danmarkip Kalaallit Nunaatalu akornanni isumaqatigiinngissutit pilersinniarai, taamatullu ilumuunngitsunik nutaarsiassiisinnaallutik danskit naalakkersuisui ajortunik pilersaarusiortut, Sermitsiaq.AG-mut oqarpoq.

- Taama ittut ingerlatiinnassagutsigit, oqaluuserisagullu ilumoornersut kikkunneersuunersullu eqqarsaatigisinnanngikkutsigit, naalagaaffimmik nikisitsisinnaapput.

Atuarfinni aallaasersornerit atornerlukkaat

Torulliliorfiit aaqqiagiinnginnerit qanoq annertusisarneraat pillugu paasisaqarusukkaanni, Floridami Parklandimi atusrfimmi siorna februaarimi aallaasersortoqarnera qiviarneqarsinnaavoq, tassani inuit 17-it toqutaapput. Tassani oqallinnermi torulliliorfiit annertuumik peqataalerput, nittartakkanilu attaveqatigiittarfinni oqallinnerni akuliullutik - nakkutilliinerulernissamullu isumaqataasut isumaqataanngitsullu assigiimmik akuleruffigaat. Anngiortumillu pilersaaruteqarneraallutik siammaapput, ilaatigut allallutik annattut ilaat atuarfimmiluunniit atuartuunngitsut, aallaasersornerlu naalagaaffiup iluani aqutsisunit ilisimaneqanngitsunit pilersaarusiorneqarsimasoq.

- USA-mi aaqqiagiinngitsoqareernerani eqquipput, assigiinngissutsit nittartakkani taama ersarissaramikkit, Claus Hjort Frederiksen (V) oqarpoq.

Torulliit saassussisarnerat ilinniarfigineqartariaqarpoq

Taanna oqarpoq tamakkuninnga annertungaatsiartumik suliaqartoqartoq, ukiunilu tullerni aamma naammattoortarumaarigut. Isummallu tamat oqartussaaneranni inerteqqutaasinnaanngimmata – aamma isummat akerlerigaluaraanniluunniit akerleriissuugaluarpataluunniit, taamaammat nittartakkani attaveqatigiiffiusuni siammaalinnginnermi eqqarsarluaqqaartoqartariaqarpoq.

- Tamanna ilinniartariaqarparput, taamaaliornissarlu perorsimanermit aallaaveqarpoq. Tamakkumi qanoq qisuariarfigissanerigut pillugit uagutsinnut piumaffiginningaatsiarpoq, illersornissamut ministeri isumaqarpoq.

Kalaallit Nunaammi Danmarkillu akornanni oqallinneq unneqqarissumik matoorinngitsumillu ingerlanneqarnissaa kissaatiginaraluartoq – aamma aaqqiagiinnginnerit eqqartorneqarsinnaasariaqaraluartut, taamaattoq nammineq aallaavigineq atorneqartariaqarpoq – Ruslandimilu nutaarsiassat isummernerillu maskinamit suliarineqartut atorneqaratik.

- Tamat oqartussaanerannik aalassatsitsisinnaasunik peqartoqarpoq. Suut ilumoortuunersut suullu ilumuunnginnersut upperisinnaanngikkutsigu, torulliliorfiillu aaqqiagiinngissutsit pioreersut atorluarlugit annertusarsinnaappatigit, taava tamat oqartussaanerat unammillernaqangaatsiartussaavoq. Tamatta ataatsimoorluta tamanna naammagalugu inooqatigiittariaqarpugut.