Internetikkut illersorniarnermi sakkut uku atorneqassapput

Digitalimik Sullissinermut Aqutsisoqarfiupataani suleqatigiit nutaat nunap internetikkut akornuserniarneqarneranut illersuinermut siuttuussapput.

Nunarput ullut tamaasa internetikkut akornusiiniartunit pinerluttartunit akornuserniarneqartareerpoq.

Kisianni ukiuni tulliuttuni aarlerinaataa annertusiartussaaq. Imaatigut angallaviit nutaat soqutiginninneq annerulersissavaa, taamatullu aamma aatsitassarsiornikkut suliaqartut – minnerunngitsumik aatsitassat pingaarutilinnut tunngatillugu. Pissaanilissuit Issittumi suliaqarnerisa annertusiartorneranni, aamma Qalasersuaq pillugu oqallittoqarnerani, it-mi atortut internetikkut akornusiiniarnernut illersornissaq suli annertusiartuinnassaaq.

- Internetikkut isumannaallisaanitta nukittorsarnissaa pingaartinnersaavarput, Tony Ditlevsdal, Digitalimik Sullissinermut Aqutsisoqarfimmi pisortaagallartoq taama oqarpoq.

Suliffeqarfiit attaveqatigiit

Pisortat suliffeqarfii kisimik internetikkut akornusiinernit eqqugaaneq ajorput, suliffeqarfinnut nammanersortut aamma eqquisarput. Naalakkersuisut taamaattumik suliffeqarfiit annerit attaveqatigiinnerannik pilersitsiniarput, taakku internetikkut upalungaarsimanermik aamma ilisimasanik avitseqatigiinnermik sulianik ukkataqassapput.

Sulineq suli taama aallartissimalereertiginngilaq, suleqatigiinnerup taassuma tunngavissaa inatsimmik nutaamik pilersinneqartussaamat, taanna ukiaanerani ataatsimiinnermi suliarineqarnissaa naatsorsuutigineqarpoq.

- Taanna suleqatigiinneq assigiinngitsorpassuarnik imaqarsinnaavoq, ilaatigullu Internetikkut isumannaallisaanermut sullissivimmi Illersornissaqarfiup Isertortumik Paasiniaasartuisa ataaniittup ilisimasaannik atuisoqarsinnaassalluni, suliffeqarfiit taamaalillutik isumannaallisaanertik nukittorsassagamikku, Tony Ditlevsdal oqarpoq.

Internetikkut isumannaallisaanermut sullissivik Danmarkimi suliffeqarfinnut IT-mi isumannaallisaanermut siunnersuisuuvoq. Tamatuma saniatigut suliffeqarfinnut inuiaqatigiinnut pingaaruteqartunut, soorlu suliffeqarfinnut nalunaarasuartaatinik suliaqartut sullissiviup isumannaallisaavianut attaveqarnissaq periarfissaavoq, taakku akornusiiniarnernut nutaaliaanerusunut illersuutaasinnaapput.

EU aamma NATO suleqatigineqartut

Danskit isertortumik paasiniaasartui kisimik suleqatiginiarneqanngillat. EU-mit nunatut isumannaatsutut akuerisaanissaq anguniarneqarpoq, taannalu paasissutissanik mianernartunik avitseqatigiinnermi EU-mit piumasaqaataavoq. Tamatuma saniatigut taamatut akuerisaaneq NATO internetikkut isumannaallisaanikkut suleqatiginiaraanni taanna pisariaqartinneqarpoq.

Digitalimik Sullissinermut Aqutsisoqarfiup ataani suleqatigiit internetikkut paasissutissiinikkullu isumannaallisaanermi tamanna ingerlanneqassaaq-

- Uagut nammineq atortutsinnut aamma suliffeqarfiit suleqatiginerannut tunngatillugu taakku ataatsimoorfiussapput, Tony Ditlevsdal oqarpoq.

Isumannaallisaanerup annertunerulernissaanut alloriarnissat ilagaat, maanna isumannaallisaanermi atorneqartup, DS 484-mik taaguutillip nunani tamalaani atorneqartup ISO 27001-mik taarserneqarnissaa.

Oqaloqatigiinnerit immikkut mianersuuttariaqartut tusarnaarneqannginnissaat qulakkeerniarlugu mobilit paasiuminaallisakkat inunnut aalajangersimasunut tunniunneqarnikuupput.

Powered by Labrador CMS