Internetikkut akornusiinerup nuna unittoortissinnaavaa
Telemi attaveqaatit ajoquteqannginnissaannik maanna qanoq pisariaqartitsiginerluta, imaatigut kabelip ajortinnerata takutippaa. Pisariaqartitsineq, taamatullu aamma ajortumeeriniarluni akornusiiniarnernut ajortiasuuneq ukiuni aggersuni annertusingaatsiassaaq.
Sorsunneq sakkunik, missilinik aamma sakkutuunik pisarpoq. Kisianni tamakkuinnarnik sorsuuteqartarneq taamaatinnikuuvoq. Ullumikkut sakkutuunit navianartorsiortitsinerit aningaasaqarnikkut sakkunit minnerunngitsumillu internetikkut assigiinngitsutigut akornusersuinernik pisarpoq.
Illersornissaqarfiup isertorlutik paasiniaasartuisa (FE) navianartorsiorneq pillugu naliliinermini kingullermi kunngeqarfimmi internetikkut akornusiisinnaaneq erseqqissaaffigaa.
- Danmarkip internetikkut akornusiiffigineqarnissaanut navianartorsiorneq qaffasissorujussuuvoq. Navianartorsiortitsineq danskit oqartussaannut, suliffeqarfinnut innuttaasunullu akornusiinerni takuneqarsinnaavoq. Navianartorsiortitsineq ungasissoq eqqarsaatigalugu tunngaviusumik atukkani sivisuumik atuuttussaavoq, FE taama naliliivoq.
Kalaallit Nunaata pingaarutilimmik inissisimaffeqarnini aamma Issittup soqutigineqaleriartuinnarnerani, internetikkut akornusiiniarnermi eqqorniarneqarsinnaavoq, illersornissamut ministerip Claus Hjort Frederiksenip (V) naqissuserpaa.
- Taamaattunut illersorsinnaanissaq naammattumik eqqumaffiginiarneqarnisersoq ernumassutigaara. It-ni atortorissaarutitigut naammattumik sillimaniartoqarnersoq, illersornissamut ministeri Sermitsiaq.AG-mut oqarpoq.
Kabelip kipinera ajortiassutsimik takutitsivoq
Internetikkut akornusiinerit assersuutigalugu kilitsissiatut sulinikkut, nunat allat pissaanillit imaluunniit qarasaasiatigut peqquserluuteqartut iserlutik paasissutissanik tilligarnerisigut pisinnaapput. Kisianni aamma isaterisinnaapput, inuiaqatigiinni atortut pingaarutillit atorunnaarsillugit. Telemi attaveqaatit taamatut akornusersorniarneqarsinnaapput. Tassuuna ajortiasuuneq Tele-Postimi ilisimaneqarluarpoq – maannalu pisup erseqqissumik takusassiaraa.
- Inuiaqatigiit attaveqaatinik qanoq pisariaqartitsitiginerluta imaatigut kabelip maannakkut kittoraqqanerata takutoppaa. Inuussutissarsiortut suliassatik suliariniarlugit pisariaqartippaat, inuillu ulluinnarni pisariaqartillugu. Attaveeruttoornerni imaluunniit telep attaveqaataani akornusiiniarnernut ajortiasuunermik tamanna aamma isumaqarpoq, Tele-Postimi pisortaaneq, Kristian Reinert Davidsen, Sermitsiaq.AG-mut taama oqarpoq.
Pisariaqartitsineq aamma ajortiasuuneq annertusiartuinnartoq, assersuutip aamma takutippaa. Ukioq ataaseq matuma siorna Avannaani sakkortusaaviit ’taamaallaat’ naammagineqarsimapput.
- Ukioq ataasiinnaq matuma siorna Avannaani attaveqaatit imaatigut kabelimut nuunneqarput. Taamaakkaluartoq imaatigut kabelip ajornerani atuineq taamaattoq sakkortusaavitsigoortinnissaa maanna ajornartorsiutigaarput. Attaveqaatinut nutaanut periarfissanut qanoq sukkatigisumik sungiussipallatsigisarnersugut takutiinnarpaa – tamatumalu saniatigut qanoq sukkatigisumik pisariaqartilertarnerigut, Kristian Reinert Davidsen oqarpoq.
Peqqinnissaqarfimmi robottit akornuserniarneqarnissaat
Sakkortusaavinnit imaatigut kabelikkut attaveqalerneq, 5G-mik attavinnut nuuttoqarnissaanut sanilliullugu alloriarneq annikitsuinnaagunarpoq.
- 5G-mut attavik atulerpat, ineriartorneq suli annertunerujussuussaaq. Sukkassusaata qaffannerujussuatigut aamma sivikinnerusumik akisalernerisigut, biilit nammineq ingerlasut, napparsimmavinni robottit nakorsiartitsisarnerat aamma paasissutissat nammineq pigisassat amerlanerit nittartakkatiguulissapput, assersuutit ilaannaat tamakku taaneqarsinnaapput.
Biilinut nammineq ingerlasunut akornusiiniartoqassagaluarpat imaluunniit napparsimmavinni robottinut akornusiiniartoqassappat qanoq pisoqarsinnaanera takorlooruminarpoq. Sverigemi maannamut biilit Teslat inerteqqutaatinneqartut, Kristian Reinert Davidsen oqaluttuarpoq, tassani atortui elektroniskiusut qitiusumit nutarterneqarsinnaammata.
- Mobilitta aamma qarasaasiatta internetimut attaveqarnerannit illumi atortutta tamarmik attaveqalernerannut pilerpugut. Paasiuminaassusaannik tamanna annertusititsingaatsiassaaq, taamaalillunilu aamma ullumikkut takorloorsinnaanngisatsinnik ajortiassuseq annertusissavaa, Tele-Postimi pisortaq oqarpoq.
Paasisaqarnerunissamut kajumissaasoq
- Nalunaarasuartaatikkut atassuteqarnitta ajutoornissamut qulakkeernissaat pisariaqartinneranik tamakku unammilligassat isumaqarput.
Tele-Post kisimi pinnani, pisortat suliffeqarfii, suliffeqarfii namminersortut aamma innuttaasut internetikkut akornusersuisinnaaneq ulluinnarsiutaaleriartortoq maluginiaqqullugu, illersornissamut ministerip Claus Hjort Frederiksenip kajumissaarutigaa.
- Illersornissamut ministeritut tassani unammilligassat eqqarsaatigilersissinnaassallugit neriuutigaara. Isumannaallisaanermik suliaqanngikkaanni qanoq ajortiatigisoqarsinnaanera pillugu Kalaallit Nunaanni oqallittoqarnissaa aamma neriuutigaara.