Internet ilungersunartoq
Suli akisuvoq nunanillu allanit kigaannerungaatsiarluni. Ukiualuilli matuma siornagut qanoq issimaneranut naleqqiullugu sukkassutsikkut tunisassianillu neqeroorutissaqarnikkut annertuumik pisoqarsimavoq, Kalaallit Nunaanni oqarasuaateqarneq internetilu pillugit Tele-Postimi pisortaaneq oqarpoq.
2017-2020-mut Tele-Postip periusissiaani allassimavoq atuisut immap naqqatigut kabeleqarfiusut internetimik sukkanerusumik ataavartumik neqeroorfigineqartassasut.
Sermitsiaq allappoq.
2017-imi minnerpaamik sekundimut 30 Mbit pineqarpoq 2018-imilu minnerpaamik sekundimut 40 Mbit. Naalli anguniakkat qaffasinnerusimagaluartut eqquutsinnissaat Tele-Postimut ajornakusoorsimavoq. Taamaalillutik atuisut 2018-imi 2019-imilu suli taamaallaat sekundimut 30 Mbit-inik neqeroorfigineqarput. Amerlanerilli sukkannerusumik nassiussisinnaanissaat qulakkeerniarneqarpoq, Tele-Postimi pisortaaneq Kristian Reinert Davidsen oqarpoq.
– Immap naqqatigut kabeli tunngaviatigut killeqanngitsumik sukkassuseqarpoq. Taamaattumik illoqarfiit immap naqqatigut kabelikkut attaveqartut piffissap ingerlanerani sukkanerusunik neqeroorfigineqassapput. Ukiualuit matuma siornagut 10 Mbit-iniit 2020-mi 60 Mbit-inut qaffassaagut. 2018-imili 40 Mbit-inut qaffaanissamut atatillugu kinguaattuulaarsimavugut. Taamaattoq pilersaarutaavoq ukioq manna nassiussisinnaanerup sukkatsinnissaa, tamannalu atuisunut pitsanngutaassaaq. Kingusinnerusukkut 40 Mbit-inik pilersuisinnaanissaq isumagissavarput, Kristian Reinert Davidsen Sermitsiamut oqarpoq erseqqissarlugulu periusissiorneq sulinermi sakkut ilagigaat, maleqqissaarneqanngilarli.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: