Internet arriitsoq: Kabelip iluarsaanneqarnera sapaatip-akunneri arlalinnik sivisusseqassaaq
Imaatigup kabelip sisamanngornermi ullaakkut kittorartup iluarsaanneqarnera sapaatip-akunnerinik arlalinnik sivisussuseqassaaq. Sapaatip-akunnerinilu arlalinni internetimut attaviup pitsaannginnissaa naatsorsuutigineqarsinnaavoq.
- Pissutsit imaaliallaannaq iluarsineqarsinnaanngitsut pissutigalugit iluarsaassinissaq sapaatip akunnerinik arlalinnik sivisussuseqarumaartoq naatsorsuutigineqarpoq, Tele-Post tusagassiuutinut nalunaarummi taama allappoq.
Imaatigut kabelip attaveqaataasoq Qaqortup avataaniittoq 3.000 meterisut ititigisumit amuarneqassaaq, taamaaleriarluni kittorarnera nassaarineqarlunilu iluarsineqassaaq. Tamatuma pinnginnerani umiarsuaq immikkut ilisimasalinnik ilaasoqartoq tikiseqqaarneqassaaq.
Piffissami sivisuumi suliarineqarnissaanut tamanna pissutaasoq, Tele-Postip nalunaarutigaa.
Kalaallit Nunaata aamma Islandip akornanni internetimut attaveqaat Qaqortup avataani, sisamanngornermi ullaakkut aserorpoq. Tamatuma kinguneranik internetimik atuisut Paamiut kujataaniittut attavilupput.
Nanoq Mediami interneteqartut eqqugaanerpaapput. Taakku maanna attaveqanngillat, Nanoq Media taamaallaat kabelimik Islandikkoortumik attavimmik pisinikuunera pissutaalluni, taannalu aseroqqavoq. Nanoq Mediami atuisunut Tele-Post aaqqiissuteqarniarluni maanna sulissuteqarpoq.
Nunap sinnerani internetimik atuisut Amerikamut attavik aqqutigalugu suli attaveqassapput. Kisianni oqaatigineqareersutut Nunatta kujataani arriitsumik attaveqassaaq.