Instituti: Inatsisiliupallannikkut politiit inuit angerlarsimaffiinut isersinnaalersinneqassapput
Inuit pisinnatitaaffiinut Instituti isumaqarpoq, parafrafi aqqutigalugu politiit eqqartuussisut aqqutigeqqarnagit angerlarsimaffinnut isersinnaalernissaannut atorneqarsinnaasoq. Kim Kielsenip ataasinngormat tusagassiortunik katersortitsinermi tamanna itigartikkaluarpaa.
Inatsisartut pingsunngorpat inatsisissamik suliaqapallattussaaput, oqartussat coronap ajornartorsiortitsineranik isumaginninnissamut amerlanerusunik tassuuna piginnaatinneqalissapput.
Siunnersuummi paragrafi qitiusoq paatsuungatitsivoq. Tassani siunnersuummi paragraf 6, imm. 2 pineqarpoq.
Paragraf 6, imm. 2
”Naalakkersuisut malittarisassanik aalajangersaasinnaapput eqqartuussiviit akuersiseqqaarnagit imm. 1-imi aalajangersakkat malinneqarneri nakkutiginiarlugit ininut allanullu isertoqarsinnaaneranut tunngasunik nakkutilliinissaq siunertaralugu.”
Inuit Pisinnaatitaaffiinut Instituti naapertorlugu, politiit eqqartuussisut aalajangiiteqqaarnagit angerlarsimaffinnut isersinnaanissaannut paragrafi atorneqarsinnaalissaaq:
- Aap, taamatorluinnaq isumaqarpugut, Christoffer Badse, Inuit Pisinnaatitaaffiinut Institutimi nakkutilliisut pisortaat oqarpoq.
Kielsen itigartitsisoq
Inatsisissatut siunnersuut Inatsisartunut, aqangu immikkut ittumik ataatsimiinnermi suliarineqartussaq, Naalakkersuisut nassiussimasaat misissorsimavaa.
Aamma Naalakkersuisut inatsiseqarnermut allaffianit ilisimatitsissutigineqarpoq, paragrafimi tassani siunertarineqartoq, assersuutigalugu inuit quliinnaat katersuuttarnissaat pillugu malittarisassanik politiit isumaginninniarlutik angerlarsimaffinnut isersinnaasarnissaat.
Ataasinngormat tusagassiorfunik katersortitsisoqarmat, Naalakkersuisut Siulittaasuata Kim Kielsenip oqaatigingaluarpaa, inatsisissaut siunnersuut aqqutigalugu politiit eqqartuussiviit aqqutigeqqaarnagit angerlarsimaffinnut isersinnaassanngitsut.
Kielsenip paragrafi alla innersuussutigaa, paragrafi pineqartoq danskit inatsisiliaannit peerneqarsimavoq, politiit innuttaasut pinngitsaalillugit katsorsarneqarnissaat imaluunniit pinngitsaalillugit akiuussutissamik kapineqarnissaat anguniarlugu angerlarsimaffinnut isertarnissaat Folketingimit kissaatigineqanngimmat.
Folketingilli paragrafi pineqartoq, Naalakkersuisut siunnersuutaasa assinga peernagu atuutsiinnarsimavaat. Tassalu inuit amerlavallaat katersuussimanersut paasiniarlugu eqqartuussiviit aqqutigeqqaarnagit poligiit angerlarsimaffinnut isersiinnaanissaat atuutsiinnarneqarluni.
Qulartoqartillugu ajornartorsiutaasinnaasoq
Sermitsiaq.AG-p paasissutissaatai naapertorlugit, Inatsisartut Allattoqarfianit aamma qularutigineqarsimavoq, paragrafi aqqutigalugu politiit angerlarsimaffinnut isersinnaatitaassanersut.
Inuit Pisinnaatitaaffiinut Institutimeersoq Christoffer Badse oqarpoq, inatsisip qanoq paasineqarnissaanik qularuteqarneq ajornartorsiutaasoq:
- Inuit pisinnaatitaaffiinut tunngatillugit qitiulluinnartut ilagaat, inatsisit erseqqissumik tunngaveqartarnissaat. Inuit minnerunngitsumillu oqartussat inatsit atuuttoq malillugu ingerlatsinissartik paasisinnaasariaqarlugulu malillugu ingerlatsisariaqarput. Taamaammat inatsisiliortut erseqqissumik nassuiaateqartariaqarput, Christoffer Badse oqarpoq.
Taassuma erseqqissaatigaa, coronap nunarsuarmi tuniluunnera eqqarsaatigalugu inatsimmik nutaamik aalajangiisoqartariaqarnera paasisinnaallugu.