Inooriaatsivit nassatarisaanik nappaatit inooqatigiuk
Kalaallit Nunaanni innuttaasut inooriaatsimik nassatarisaannik nappaatillit nappaatiminnik ilisimasaqarnerulersinnaasariaqarput. Ilisimasaqarluarunimmi nappaatit malittaasut pinngitsoortinneqarsinnaagamik.
Inooriaaseq pissutigalugu nappaatigilikkat pillugit ilisimasaqarluarnissaq pingaaruteqartoq, Steno Diabetes Center Grønland allappoq. Qanorippali sukkornermik nappaateqarluni, imaluunniit pualluummik KOL-imik nappaateqarluni?
Taakkuninnga nappaateqartup kisimi tamanna ilisimavaa.
- Sukkortunngorsimasut, KOL-eqalersimasullu kisimik ilisimavaat, taamaammat taakku oqaloqatiginissaat pingaaruteqarpoq, ph.d.-nngorniaq Maja Hykkelbjerg Nielsen oqarpoq.
Taanna nappaateqartunik arlalinnik oqaloqateqareersimavoq, nappaateqarneq pillugu ph.d.-liornermini ilisimasanik katersigami. Ph.d.-liornermi Steno Diabetes Center Grønland, Ilisimatusarfik aamma Aarhus Universitet suleqatigiipput.
Amerlanerit nappaatertik ilisimasaqarfigisariaqaraat
Steno Diabetes Center Grønland nappaatit pillugit paasissutissanik katersivoq.
Paasisat amerlaneruppata, inooriaaseq pissutigalugu nappaateqalersimasut kingunerluutigisanik nappaateqalinnginnissaminnut iliuuseqarnerusinnaapput.
- Neriuutigaarput inooriaaseq pissutigalugu nappaateqalersimasut amerlanerusut pitsaanerusumik inuuneqarsinnaassasut, nappaateqaraluarlutik. Taamaaliornikkut nappaatit malittaasut pinngitsoortinneqarsinnaapput, ilisimatusartoq Steno Diabetes Center Grønlandimilu pisortaq, Michael Lynge Pedersen oqarpoq.
Inooriaatsip nassatarisaanik nappaateqalersartut amerliartortut
Kalaallit Nunaanni inuit amerliartuinnartut type 2 diabeteseqalersarput, aamik naqitsineranik qaffasittuulersarput imaluunniit KOL-eqalersarlutik. Steno Diabetes Center Grønlandimit naatsorsuutigineqarpoq, 2030-mi inuit tallimaagaangata ataaseq inooriaatsip nassatarisaanik ataatsimik arlalinnilluunniit nappaateqalertassasoq.
- Inuit taamak amerlatigisut inooriaatsimik nassataannik nappaateqalersimappata pingaaruteqarpoq, nappaateqaraluarlutik ajunngitsumik inuuneqarnissamut pitsaanerpaamik tunngavissaqarnissaat, sMichael Lynge Pedersen oqarpoq.
Ph.d-liortoqarnerata saniatigut Steno Diabetes Center Grønland inooriaaseq pissutigalugu nappaatit pillugit quppersakkanik paasissutissartalinnik suliaqassaaq.