Innuttaasut ukiut pingajussaannik amerleriarput
Innuttaasut ukiumi kingullermi 100-nit amerlanerulaartunit amerleriarput, Naatsorsueqqissaartarfimmi kisitsisit nutaat takutippaat.
2019-imi januaarip aallaqqaataani Kalaallit Nunaanni inuit 55.992-it najugaqarput.
Naatsorsueqqissaartarfimmit kisitsisit nutaat tamanna takutippaa. Taamaasilluni ukiuni pingasuni kingullerni innuttaasut amerliartorsimapput.
Siorna ukiup ingerlanerani innuttaasut 115-inik amerleriarsimapput. Tupinnanngitsumik illoqarfiit pingaarnersaata kommunia innuttaasoqarnersaavoq. Tassani innuttaasut 188-nik amerleriarsimapput, nunattalu innuttaasuisa 32,1 procentii maanna Nuummi najugaqartut kisitsisit takutippaat. Tassami illoqarfiit pingaarnersaanni inuit 17.984-it najugaqarput.
Kommunit marluk inukilleriartut
Kommune Kujalleq aamma Avannaata Kommunia piffissami tassani inukilleriarput. Kujataani kommunimi innuttaasut 182-nik ikileriarput, taamaalilluni januaarip aallaqqaataani inuit 6.442-t najugaqarput, avannaani kommunimit innuttaasut 62-t kommunimit nuupput, taamaalilluni maanna inuit 10.522-t Avannaata Kommuniani najugaqarlerlutik.
Kommunit sinnerini Kommuneqarfik Sermersuumi, Qeqqata Kommuniani aamma Kommune Qeqertammi amerleriarput.
Sermersuumi innuttaasut 22.946-t najugaqarput, taakkulu ukiumit kingullermit 208-nik amerlanerupput. Qeqqata Kommuniani 114-nik amerleriarput, maanna inuit 9.409-t najugaqalerlutik, Kommune Qeqertalimmi innuttaasut 54-nik amerleriarput, maanna 6.587-t najugaqarlutik.
Nunanit allaneersut amerleriartut
Nunanit allaneersut Nunatsinni najugaqartut aatsaat taama amerlatigisut, Naatsorsueqqissaartarfimmit kisitsisit takutippaat.
Nunani allani innuttaassusillit amerlassusaat ukiuni kingullerni marlunni ikiliartortut, ukioq kingulleq amerleriangaatsiarsimapput.
Ullumikkut nunani allani innuttaassusillit katillugit 1.112-it Kalaallit Nunaanni najugaqarput. Siorna taakku 970-iupput. Kisitsisitigut paasissutissat tabelianni takuneqarsinnaavoq nunani allani innuttaassusillit pingaartumik Filippinerit (290), Kinamiut (62) kiisalu Thailandiminngaanneersut (182) amerleriarsimasut, ukiup ataatsip matuma siornarnit nunani taakkunani pingasuni innuttaassuseqartut katillugit 127-nik amerlisimapput, Naatsorsueqqissaartarfik ilisimatitsivoq.