Innuttaasut tuusintilikkaat pisortanit aningaasanik pissarsinngitsoorsinnaasut
Pisortanit akissarsiat, ineqarnermut tapiissutit, pensionit aamma SU qanittukkut NemKonto taamaallaat aqqutigalugu pisalertussaavoq. Maannakkorpiaq innuttaasut affaat taamaallaat taamaattumik kontoqarput, Digitalimik Sullissinermut Aqutsisoqarfik taama ilisimatitsivoq.
Siunissami qaninnermi pisortanit aningaasanik tunniussisarneq NemKonto aqqutigalugu pisalissaaq, Kommuneqarfik Sermersooq nittartakkamini allappoq.
Nunatsinni innuttaasunut tamanut atuuttoq, Digitalimik Sullissinermut Aqutsisoqarfik ilisimatitsivoq.
Taamaattumik innuttaasutut suliffeqarfittullu aningaaserivinni NemKontoqarnerlutit qulakkiissallugu pingaaruteqarpoq – taamaanngippat kommunimit imaluunniit pisortat suliffeqarfiinit allanit aningaasanik pissarsisinnaanngilatit. Ilaatigut akissarsiat, ineqarnermut tapiissutit, pensionit aamma SU pineqarput.
Naak Kommuneqarfik Sermersooq naapertorlugu NemKontoqarnissaq inatsisitigut piumasaqaataagaluartoq, kikkut tamarmik taama ittumik peqanngillat.
NemKontoqalernissaq ajornanngitsoq
Innuttaasut affaat – innuttaasut naatsorsuutigineqartunit katillugit 43.500-nit 20.500-t - taamaaliornissartik amigaatigaat, Digitalimik Sullissinermut Aqutsisoqarfimmit kisitsisit takutippaat.
Akerlianilli netbank aqqutigalugu NemKontomik peqalernissaq ajornanngitsuararsuuvoq, kisianni MitID piginissaa piumasaqaataavoq – taamaanngippat isertoqarsinnaanngitsoq.
Naak aningaaseriviit qangalili NemID atorunnaaraluaraat, innuttaasunit 33.000-nit suli 2.500-t MitID-mik atugaqalinngillat, taamaattumillu Nemkonto.dk aqqutigalugu NemID atorlugu NemKontomik ammaanngikkunik ammaasinnaanngillat.
Taamaattoq NemID imaluunniit MitID piginissaat inatsisitigut piumasaqaataanngilaq.
NemID-p matuneqarnissaa 31. oktober 2023-mut kinguartinneqarsimasoq, danskit Digitalimik Sullissinermut Aqutsisoqarfiata qanittukkut nalunaarutigaa.
Innuttaasutut ajornannginnerusoq
NemKontomik tamakkiisumik atuilernissamut ulloq suli aalajangerneqarsimanngitsoq, nunatsinni Digitalimik Sullissinermut Aqutsisoqarfik Sermitsiaq.AG-mut ilisimatitsivoq, kisianni ulloq aalajangiunneqarpat ingerlaannaq nalunaarutigineqarumaarpoq.
Digitalimik Sullissinermut Aqutsisoqarfik naapertorlugu NemKontomik atuilerneq innuttaasunut oqinnerulersitsissaaq, tassami oqartussanut assigiinngitsunut kontop normuanik ilisimatitsinissaq pisariaqarunnaassammat, taakku tamarmik NemKonto atorlugu akilerneqartalissammata.
NemKonto pillugu annertunerusumik uani atuarsinnaavutit:
- Atuutilersitsineq netbankikkut imaluunniit NemKonto aqqutigalugu pisinnaavoq
- Uani paasisaqarnerusinnaavutit: Sullissivik – NemKonto
- Inatsit takuuk: Inatsit – NemKonto
