Innuttaasut tuusintilikkaat net- iml. mobilbankiminnut isersinnaanngillat
Oktobarip 31-niilli MitID-eqarani netbankimut isertoqarsinnaajunnaarpoq - innuttaasut 33.000-iusut 11 procentii suli MitID-qalersimanngillat.
3.719-it - innuttaasut taamatut amerlatigut aningaasanik nuussiniarlutik akiligassaminnilluunniit akiliiniarlutik net- imaluunniit mobilbankiminnut isersinnaanngillat. Innuttaasummi MitID-qarnissamik naatsorsuutigineqartut 33.000-iusut 89 procentii kisimik maannakkorpiaq MitID-eqalersimapput, tamanna Digitalimik Sullissinermut Aqutsisoqarfiup kisitsisaataasa takutippaat.
MitID-qartussatut naatsorsuutigineqartut 11 procentii, aningaaseriviit NemID-mik novembarip aallaqqaataani atuiunnaarmatali taamatut atugaqalersimapput. Digitalimik Sullissinermut Aqutsisoqarfimmit ilisimatitsissutigineqarpoq, innuttaasut NemID-qartut internetsikkut MitID-mik pilersitsisinnaasut aamma kommunit innuttaasunut sullissivii MitID-mittunniussinissamut akuerisaasimasut ikiuussinnaasut. Innuttaasut NemID-qanngitsut passertik atorlugu imaluunniit innuttaasunut sullissivimmut saaffiginnillutik MitID-p app-ia atorlugu MitID-qalersinnaapput.
Sumiiffinnili tamani innuttaasunut sullissiviit innuttaasunut suli MitID-qalersimanngitsunut ikiuinissamut peiarfissaqanngillat.
Kommuni Kujalleq, Avannaata Kommunia, Qeqqata Kommunia aamma Kommuni Qeqertalik innuttaasunut MitID-mik suli tunniussisinnaanngillat.
Kommunit ukiumi ataatsimi tamatumannga ilisimasaqarsimasut
MitID pillugu inatsit Inatsisartut 2021-mi ukiakkut ataatsimiinnerani akuerineqapoq. 201-mili decembarip qaammataanili kommunit MitID-mik tunniussisinnaanermut akuersissummik pissarsinissamut suliassaqalersimapput - maannamuugallartorlu Kommuneqarfik Sermersooq kisimi suliassaminik isumaginnissimalluni. Digitalimik Sullissinermut Aqutsisoqarfik suliassamut tamatumunnga kommuninut ikiuutigaatsiarsimagaluartoq.
Digitalimik Sullissinermut Aqutsisoqarfimmit ilisimatitsissutigineqarpoq, kommunit tamarmik MitID-mik tunniussisinnaanngornissamut namminneerlutik akisussaaffeqartut. Taamaammayt MitID-mut atatillugu apeqqutissat tamarmik kommuninut saaffiginnissutigineqartussaapput. Kommunit tamatumannga isumaginninnissamut piffissalerneqarsimapput:
Ulloq 31. januar 2023 kommunit MitID-mik tunniussinissamut akuerineqareersimassapput.