nultolerance
Innuttaasut taasitinnissaat Atassutip tapersinngilaa
Uranimut naaggaarluinnarsimanerup innuttaasunik taasititsinertaqanngitsumik Inatsisartuni suliarinissaa Atassutip aalajangiusimagaa, partiip siulittaasua Gerhardt Petersen oqarpoq
Uran pillugu oqallinnermi Partii Inuinneersoq Randi Broberg naalakkersuisooqatigisaminnit Atassummit taperserneqanngilaq. Uranimut naaggaarluinnarnerup atorunnaarsinnissaanik siunnersuutip innuttaasunit taasititsissutiginissaa Atassutip ilalinngilaa.
Atuaruk: Randi Broberg: Urani innuttaasuni taasissutaali
- Naalakkersuisut siunnersuutissaat pissangalluta utaqqivarput isumaqarpugullu siunnersuut innuttaasunut taasissutigitinngikkaluarlugu Inatsisartuni naammassillugu suliarineqartariaqartoq, Atassutip siulittaasua Gerhardt Petersen Sermitsiaq.AG-mut oqarpoq.
Randi Broberg ataasinngornermi ullaakkut nalunaarpoq uranip aatsitassarsiornermi saniatigooralugu piaarneqarnissaa imaasiallaannaq akuerisinnaanagu. Taanna isumaqarpoq innuttaasut peqqissusaat avatangiisillu innarlernagit tamatuma pisinnaanissaanut uppernarsaatissat suli amigartut.
Atuaruk: Urani Folketingimi avissaarutaavoq
- Uagut aamma peqataaffigisinnaanngilarput uranimut naaggaarluinnarnerup atorunnaarsinnissaa innuttaasunut ajoqutaassappat. Kisianni tassa ilisimasat nutaat takkussortuarput soorlu aatsitassap ruujorersuatigut toqqaannartumik umiarsuarnut ingerlatissinnaanissaa periarfissaammat, Gerhardt Petersen oqarpoq.
Misigisimavit aalajangernissamut tunngavissat naammattut?
- Aatsitassat uranimik akuisa minnerpaaffissaat EU-mi aamma USA-mi atuuppoq ukiorpassuarni misilittagaqarfigineqarluni. Maanna siunnersuut ukiaanerani siullermeerlugu aappassaanneerlugulu suliarisussanngorparput pingajussaanneerneralu upernaamut pisussaalluni. Naatsorsuutigaarput aalajangernissamut naammattunik tunngavissinneqarumaarluta, Gerhardt Petersen oqarpoq.
- Uranimut naaggaarluinnarnerup atorunnaarnissaa qineqqusaarutiginikuuarput aamma Nunarput aningaasarsiorfissanik nutaanik amigaateqarpoq. Taamaammat innuttaasut taasiteqqaanngikkaluarlugit siunnersuutip Inatsisartuni suliarinissaa tapersersorparput, Gerhardt Petersen oqarpoq.
Naalakkersuisut siulittaasuat Sermitsiaq.AG-mit maanna oqaaseqartinniarneqarpoq.