Skip to main content

Innuttaasut nualluummut akiuussuserneqassapput

Covid-19-ip nunarsuarmi tuniluunnera peqqutigalugu 2020-mi ukiaanerani nualluummut akiuussutissamik kapitinnissamut innersuussiffiusut nalinginnaasumit amerlanerulersinneqarput. Napparsimaveqarfik immikkut ittumik iliuuseqarpoq.

Nualluutit inuppassuarnut, Covid-19-imik tunillatsikkunik napparsimangaatsialersinnaasunut aamma ulorianartorsiortitsinermik annertusititsisussaapput.

- Covid-19-ip nunarsuarmi tuniluunnera eqqarsaatigalugu aamma inuiaqatigiinni nualluutit tuniluunnissaasa pinaveersaartinneqarnissaa eqqumaffigineqartorujussuuvoq. Ataatsimut isigalugu innuttaasut, pingaartumillu innuttaasut nuallulernerminni atuipiloorsinnaasut akornanni napparsimalertussat ikilisinniarneqarnissaat siunertarineqarpoq. Aamma peqqinnissaqarfinni paaqqutarinniffinnilu napparsimasoqalernissaata pinaveersaartinneqarnissaa siunertarineqarpoq, Namminersorlutik Oqartussat tusagassiutinut nalunaarummi allapput.

Akiuussutissat 4.500-t

Peqqinnissaqarfik maannamut kapuutinik akiuussutissanik 4.500-nik tigusaqarpoq, taakkulu nunap immikkoortuinut tamanut siaruarterneqassapput. Kingusinnerusukkut pilersuisoqaqqissaaq, ilisimatitsissutigineqarpoq.

Sumi qaqugulu akiuussutissanik kapuisoqassanersoq pillugu illoqarfinni, najukkani aviisitigut aamma inuit attaveqartarfiisigut allagarsiinikkut paasissutissiisoqassaaq. Nunaqarfinni annerusuni innuttaasut sulisullu nunaqarfimmi kapitinnissamut neqeroorfigineqassapput. Nunaqarfinni minnerni innuttaasut illoqarfinniinnerminnut atatillugu kapitinnissamut neqeroorfigineqassapput.

Ukioq manna akiuussutissanik kapitittussat amerlangaatsiarmata, sumiiffinni kapuiffiusuni kikkut siulliullutik akiuussutissamik kapitinnissamut neqeroorfigineqassanersut tulleriiaarisoqassaaq.

Tulleriiaarinerit matuma kinguliani tabelimi takuneqarsinnaapput. Innuttaasunit siunnerfiusut ataasiakkaat qanoq ilinerani akiuussutissamik kapitissanersut najukkani nalunaarutigineqartassapput.

Imm. 2-mi aaqqinneqarsinnaanngitsunik nappaatillit taaneqartut tassaapput:

  • Aaqqinneqarsinnaanngitsunik pualluutillit
  • Uummatimikkut taqqamikkullu nappaatillit (aap naqitsineranik qaffasittoortut ilaatinneqanngillat)
  • Diabetes 1-imik imaluunniit 2-mik nappaateqarlutik sukkortut
  • Inunnguutsiminnik imaluunniit pigilersimasaminnik timip akiuussinnaassusiatigut ajoqutillit
  • Nukillaarneq peqqutigalugu anersaartorniarnermikkut ajoqutillit
  • Aaqqinneqarsinnaanngitsunik tingulluutillit tartuluutillillu
  • Nappaatit aaqqinneqarsinnaanngitsut allat, nuallunnermi napparsimarujussuarnermik nassataqarsinnaasut

- Kikkulluunniit, ukioq manna nualluummut akiuussutissamik kapuinermi innuttaasuni siunnerfiusuni ataatsimi amerlanerusuniluunniit akuusut akiuussutissamik kapiteqqullugit annertuumik kaammattorneqarput. Suliniut manna suliniuterpassuit, Covid-19-ip nunarsuarmi tuniluunnerani Kalaallit Nunaata pitsaanerpaamik aniguinissaa anguniarlugu ingerlanneqartut ilagaat, nalunaarutigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER