Innuttaasut namminneq kissaatiginngikkaluarlugu nunaqarfiit qimaannartariaqartaraat

Nunaqarfinni innuttaasut pitsaanerusumik inuuneqarnissaq anguniarlugu nunaqarfimminnik qimatsiinnartariaqartartut amerliartorput – nunaqarfiillu ineriartortinneqarnissaat politikerit eqqumaffiginerusariaqaraat taakku isumaqarput

Kalaallit Nunaanni nunaqarfiit arriitsumik inuerukkiartorput, illoqarfinnullu nutserneq suliffissanik ilinniarnissamullu periarfissanik pitsaanerusunik ujartuinermik amerlasuutigut peqquteqartarpoq. Amerlasuulli namminneq kissaatiginngikkaluarlugu, allatulli ajornartumik nunaqarfinniit illoqarfinnut nuuttariaqartarput.

Taakkuli aamma nunaqarfimminnut uteqqinnisartik kissaatigisaraluarpaat, taamaattumillu nunaqarfinni inuussutissarsiornikkut ineriartortitsinissaq maannakkornit suli annertunerusumik politikerit sulissutigisariaqaraat, taakku isumaqarput, Sermitsiaq allappoq.

Ukiorpassuarni Alluitsup Paa nunaqarfinni ingerlalluarnerpaat ilagisimavaat, 1980-imilu 600-t sinnilaarlugit inoqarsimalluni. Taamanikkut raajanik tunisassiorneq inuussutissarsiornerup pitsaasumik ingerlaneranut pissutaanerpaavoq, allaallu nunaqarfik illoqarfinngortinneqassanertoq piffissap ilaani eqqartorneqartarsimavoq

Inuttut pilliuteqarneq

Nunaqarfillu qimallugu 2004-imi Narsarsuarmut suliartortariaqarsimasut ilagaat 65-inik ukiulik Paviane Karolussen, inuussutissalerinermik ilinniagaqarsimasoq. Taanna 2011-imi Nuummut nuuppoq suliffeqarfiillu ilaata igaffiani, suli maannakkumut suliffigisamini atorfittaarluni.

Taanna 2001 tikillugu Alluitsup Paani fabrikkimi atorfeqarsimagaluarpoq. Nunaqarfimmili inuuneq toqqissisimanartoq innuttaasullu ataqatigiiluartut maqaasiuartarsimavai, suliffissaqartuugunilu siunissami Alluitsup Paanut uteqqinnissani takorloorsinnaagaluarpaa.

- Nunaqarfimmi inuuneq toqqissisimanartoq nammineq kissaatiginngisamik, allatulli ajornartumik qimattariaqarsimallugu, inuttut annertuumik pilliuteqarnarpoq. Nunaqarfimmilu suliffissaqartuupput uterusussinnaassagaluarpunga, nalunngilaralu aamma allarpassuit taamatut misigisimasartut, Paviane Karolussen oqarpoq.

Nunaqarfiillu piujuaannarnissaannut inuussutissarsiorneq tunngaviliisuulluinnarmat, nunaqarfinni inuussutissarsiutit siuarsaaffigineqarnissaat politikerit eqqummaariffiginerusariaqaraat, taanna isumaqarpoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS