Innuttaasut MIO-mut saaffiginnittartut marloriaatinngortut
Innuttaasut MIO-mut saaffiginnittartut ukiut sisamat ingerlanerinnaani marloriaatinngorput. MIO-mut saaffiginnittut 2020-mi 598-iupput.
Innuttaasut 2016-imi saaffiginnittut 288-iusut, 2020-mi 598-iupput.
Innuttaasut saaffiginnittarneri pillugit MIO-p naatsorsuusiorsimaneri saqqummiunneqaqqammersut taama takussutissiipput.
- Kommunit arriippallaamik sullissinerat innuttaasut Meeqqat Pisinnaatitaaffiinik Sullissivimmut MIO-mut saaffiginnissutigisartagaannut pissutaasut annertunersaraat, Meeqqat illersuisuat Aviâja Egede Lynge taama oqarpoq itisiliillunilu:
- Sullissinerup amigaatigineqartup ajoraluartumik kingunerivaa meeqqat inuusuttullu
sumiginnarneqartut, oqartussanit ikiorneqarnissartik erngertumik pisariaqartitartik
pisinnaatitaaffigisartillu pissarsiarineq ajoraat.
Facebookikkut saaffiginnittut amerliartorput
Saaffiginnissutit amerlanerpaat Facebookikkut saaffiginnissutaapput. 2020-mi saaffiginnittut 61 procentii Facebookikkut saaffiginnissimapput. Tassa 598-iusuni 365-it.
- Ilaqutariit MIO attaveqarfigaat oqaluttuarlutillu, ataataasup meeqqaminik kinguaassiuutitigut atornerluisimasutut pasisaanerata kingorna, meeqqaminnik atuartunik pingasunik pisortanit arsaagaasimallutik. Tamatuma kingorna ilaqutariit isumaginnittoqarfimmut attaveqarniartarsimagaluarput, saaffiginnissutaalli qisuarfigineqarneq ajorsimapput, MIO nalunaarusiornermini allappoq.
Arriippallaamik sullissineq
MIO-mut saaffiginnissutit amerlanerpaartaat kommunit sullissinerinut, angajoqqaatut oqartussaassuseq pillugu sulianut, sulianut atuarfinnut attuumassuteqartunut, kinguaassiutitigut atornerluinermut kiisalu nakuusernermut, meeqqanut inissinneqarsimasunut, nalunaarutiginninnerit pillugit saaffigininnernut kiisalu kommunit nakkutiginninnerannut tunngasuupput.
Saaffiginniffiusartut allanngoriaateqarsimagaluartut, saaffiginnissutit allannguuteqanngillat. Innuttaasut MIO-mut siunnersoqqullutik saaffiginnikkaangamik amerlanerpaartaatigut kommunit sullissinerat pillugu suli saaffiginnittarput. Kommunit sullissinerisa arriippallaarnerat pillugu innuttaasut 83-it MIO-mut saaffiginnissimapput.
- Ukiuni kingullerni pissutsit taamaaginnarput: Kommunit sullissisarnerat pillugu saaffiginnissutit amerlanerpaat pissarsiarisarpagut. Suliamik suliaqartunit kiisalu oqartussaasunit suliarujussuaq ingerlanneqaraluartoq, saaffiginnissutigineqartartut taakku takutippaat, oqartussaasut sulinerat nukittorsarniarlugu suli iliuuseqartoqarnerusariaqartoq. Taamaattumik innersuussutigisatta ilagivaat, aningaasaqarnikkut kiisalu sulisoqarnikkut iluaqutissanik qulakkeerinnittoqassasoq, taamaasillutik kommunit inatsisit malillugit sulisinnaaniassammata, Aviâja Egede Lynge oqarpoq.