Innuttaasut Kuannersuit pillugit: Taava susoqassava?
Aatsitassanut naalakkersuisup Naaja Nathanielsenip (IA) Narsarsuarmi ataasinngormat innuuttasunik ataatsimiititsinermut takkuttorpassuaqarnera nuannaarutigaa. Innuttaasut takkussimasut paaserusussimavaat, Kuannersuarni aatsitassarsiorniarneq unitsinneqarpat, Kuannersuarnut atatillugu qanoq pilersaaruteqartoqarnersoq.
Kuannersuarni aatsitassarsiorniarneq maanna tusarniassutigineqartoq pillugu ataasinngormat Narsarsuarmi innuttaasunik ataatsimiitsitsinermut 25-t missaannittut takkussimapput.
Aatsitassanut Naalakkersuisup Naaja Nathanielsenip (IA) Sermitsiaq.AG-mut oqaluttuaraa, ataatsimiinnissaq sioqqullugu piareersimaffigereersimallugu, innuttaasut februaarimi ataatsimiitsitsisoqarnerani siullermi kissaatigisamittut akissutissarsereersimanissaat.
Innuttaasorpassuilli takkussimapput, Naaja Nathanielsenimullu apeqqutissarpassuaqarsimallutik.
- Apeqqutigineqartut amerlanersaat politikkikut tunngassuteqarput, Kuannersuarnilu suliniutaasoq taamaatiinnarneqassappat Kujataani susoqarnissaanut tunngassuteqarnerullutik, Naaja Nathanielsen oqaluttuarpoq.
Taava susoqassava?
Suliniut politikkerit akornanni innuttaasullu akornanni isumaqatigiinngissutaasimasoq, Kujataani inuussutissarsiutit ineriartortinneqarnissaannik, nutaanik suliffissaqartitsilernissaanik isumalluartitsisimavoq, aammali avatangisinut peqqissutsimullu tunngatillugit ernumalersitsisimalluni.
Naaja Nathanielsenip erseqqissaassutigaa, suliniut inatsit atuuttoq naapertorlugu suli suliarineqartussaasoq, tassa nunami uranitalinnik piiaasoqanngilluinnarnissaa pillugu inatsisissatut siunnersuut ukiaru Inatsisartuni suliarineqartussaq, maanna tusarniaassutigineqartoq naapertorlugu suliarineqartussaannginnerarpaa.
Unnummi ataatsimiinnermi apeqqutigineqartut ilaatigut ilagaat, sumiiffimmi eqqissisimatitsinissamut periarfissaqartitsisoqarnersoq aamma nunap immikkoortuani inuussutissarsiutinik ineriartortitsinissamut sunik allanik periarfissaqarnersoq.
- Nunap immikkoortuani aatsitassanik qaqutigoortumik aatsitassarsiortoqarsinnaanera periarfissaqarluartutut isigaara. Pingaartumik aatsitassarsiornerup iluani aatsitassarsiornerit annikitsut amerlanerusinnaapput. Aamma ujarassiortitsilluni takornariatitsisoqarsinnaanera, politikkikkut suli ammaaffigineqarnikuunngilaq, taanna oqarpoq.
Piffisamut ungasissumut isumaqatigiissuteqartoqassasoq
Naaja Nathanielsenip erseqqissaassutigaa, nunap immikkoortuani ineriartortitsinissamut amerlanerit isumaqatigiissuteqarnissaat politikkikkullu patajaatsumik ingerlatsisoqarnissaa ukkatarineqartoq, aningaasaliissuteqartartut innuttaasullu siunnerfiginiakkamik tatiginninnerulernissaat anguniarlugu.
- Innuttaasorpassuit ernummatigisimavaat, siunnerfik maanna ingerlatarput, qinigaaffiup matuma kingorna politikkikkut pissaanermik tigummiaqartut allanngoqqissappata allanngorteqqinneqassanersoq. Sangujoraartumik ingerlatsissanngikkutta, partiini tamani immitsinnut nassaarisariaqarpugut. Nunap immikkoortua eqqissisimasumik ineriartortinneqanngippat aningaasaliissuteqarusussuseq annikillisinnaavoq, taanna erseqqissaavoq.
Taamaammat politikkerit inuussutissarsiutit assigiinngitsut iluini piffissamut ungasissumut pilersaarusiortoqarnissaa qulakkeerniarlugu sinaakkusersuisariaqartut naalakkersuisoq isumaqarpoq.
- Ukiaru ataatsimiittoqalerpat inatsisissatut siunnersuutinik marlunnik saqqummiussissaanga. Aappaa aatsitassarsiornermut tunngassuteqassaaq, aappaalu annikitsumik aatsitassarsiornermut tunngassuteqassalluni, kingullertut taasami aatsitassarsiorniat maannamut aporfigisartagaasa ilaannik oqaasertaliiniassalluta.