Innuttaasut ikiliartorput - borgmesterip naligiinnerunissaq piumasaraa

Innuttaasut illoqarfiit pingaarnersaannut Nuummut nuuttartut, Sermitsiaq.AG-mi tallimanngornermi allaaseraarput.

Naatsorsueqqissaartarfimmi kisitsisit naapertorlugit ukiup kingulliup ingerlanerani Kommune Kujallermi innuttaasut ikileriarsimapput, tassa innuttaasut 119-inik ikileriarput. Januaarip aallaqqaataani Kommune Kujallermi innuttaasut 6.692-iupput.

Innuttaasut kommunimiitiinnarniarlugit qanoq iliornersoq, Kommune Kujallermi borgmesteri Jørgen Wæver Johansen (S), Sermitsiaq.AG-p apeqquteqarfigaa.

Inuuniarnermi atukkat kommunimi pitsanngorsarniarlugit kommuni arlalinnik suliniuteqarsimasoq, Jørgen Wæver Johansenip erseqqissaatigaa.

Atuaruk: Nuummi innuttaasut amerleriarujussuartut

Suliniutit arlallit
Meeqqat atuarfiisa pitsaanerulernissaat kommunip sulissutigisimavaa. Sumiiffiit amerlanerpaat maanna nutaaliaasunik atuarfeqarput, Alluitsup Paani aamma Qassiarsummi atuarfiit nutarsarneqarnissaat aamma pilersaarutaavoq.

- Meeqqat atuarfianni meeqqat tamarmik siunissamut periarfissagissaarneroqqullugit tamarmik atuarnerminni teknikkikkut atortorissaarutinik iPad-inik atugaqarput, angajoqqaat isertitaat apeqqutaatinnagit, Jørgen Wæver Johansen oqarpoq.

Meeqqerivinnut akiliutit appartinniarlugit kommuni sulissuteqarsimasoq aamma oqaatigaa.

2012-imi akit qaffasinnerpaat meeqqamut ataatsimut 4.000 koruuniupput qaammammut, maanna qaffasinnerpaamik akiliutit qaammammut 1.500 koruuniuvoq, aappaagulu 1.000 koruunimut appartinneqarnissaa naatsorsuutigineqarluni, Kommune Kujallermi borgmesteri erseqqissaavoq.

Atuaruk: Allamiut Kalaallit Nunaanniittut amerlanerusut

Suliassat
Inuussutissarsiornermut tunngatillugu saarullittassiissutit 1.500 tonsinit 11.000 tonsinut 2013-imit 2016-imut qaffannikuupput, Jørgen Wæver Johansenilu naapertorlugu kommunimi amerlanerusunik tamanna suliffissaqartitsilerpoq.

- Namminersorlutik Oqartussat suleqatigalugit Campus Kujalleq annertusarneqaleruttorpoq, taamaalillutik 2018-imi ilinniartuutigineqartut minnerpaamik 100-nik amerlineqarsinnaanngorlugit.

- Shanghaip Kommunianut suleqateqarnerput aqqutigalugu kineserisut aamma ilinniartoqarsinnaanngussaaq, inuusuttullu Shanghaimut ilinniariarnissaminnut ammaanneqarlutik. Taamaaliornikkut inuusuttortatsinnut ilinniartitaanerup periarfissat pitsanngorsarneqarnerat ingerlavoq, Jørgen Wæver Johansen oqarpoq.

Atuaruk: Ineriartorneq mumippoq - innuttaasut maanna amerleriarput

Aningaasaqarneq pitsaanerusoq
Taanna naapertorlugu illoqarfimmi mittarfittaassaq Kujataanut tamarmut iluaqutaassaaq.

- Angallannerup tungaatigut Qaqortup Narsallu akornanni mittarfiliornissaq aqqutigalugu nunatta sinnera, nunarsuullu sinnera Kommune Kujallermut qaninnerulissapput. Mittarfik naammassippat aningaasartuutinik tamanut sipaarfiussaaq, borgmesteri nassuiaavoq.

Kajumissutsimik suliaqartunut aningaasaliisoqarpoq, aamma kommunimi utoqqaat illui pitsanngorsarneqartut taanna ilisimatitsivoq.

Assit takukkit: Qaqortumi mittarfimmut misissueqqaarnernut qaartitsinerit

Naligiinnerunissamik ujartuisoq
- Kommunimi innuttaasut ikileriarsimanerannut suna pissutaasimasinnaava?

- Inuit periarfissat malillugit nutsertarnerat ukiorpassuarni ingerlavoq. Taamaammat pisortat ingerlatsivii, suliffeqarfii ilinniarfeqarfiilu annerusumik illoqarfimmi ataasiinnaanerusumi inissisimanerat allanngortariaqarpoq – taamaalilluta naligiinnerusumik siunissami periarfissaqarnissarput aqqutissiuutissavarput. Naligiinnerusumik periarfissaqarnerput aallaavigalugu aamma innuttaasut nunatsinni siammaqqanerat qularutissaanngitsumik naligiinnerulertussaavoq.

- Pisortat tugaanniit sanaartornikkut, aningaasaliiffigineqartarnikkut qularnaveeqquserneqartarnikkullu assigiinnerusumik periarfissinneqanngikkutta taava soorunami pissutsit allanngornavianngillat, Kommune Kujallermi borgmesteri erseqqissaavoq.

Kommunini sanaartortitsinissat naligiimmik agguataarneqanngippata inuiaqatigiinni siuariartortoqarnavianngitsoq, taassuma oqaatigaa.

- Tamanna kialluunniit takusinnaavaa. Allanik pitsaanerusumik pineqarnissarput uagut ujartunngilarput, naligiinnerusumilli periarfissinneqarnissarput kissaatigaarput, Kommune Kujallermi borgmesteri Jørgen Wæver Johansen oqarpoq.

Atuaruk: Kommunimi politikerit Disko Line isornartorsioraat