Innuttaasut ikigisassaanngitsut pisortanut akiitsoqarput
Inuit 13.000-ingajaat ukiumut 250.000 koruunit tikillugit isertitallit pisortanut akiitsoqarput.
Innuttaasut ukiumut 250.000 koruunit tikillugit isertitallit 12.754-it pisortanut akiitsoqarput. Tassa innuttaasut tamarmiusut 22 procentiisa missaat.
Kisitsit, Aningaasaqarnermut Naalakkersuisup, Vittus Qujaukitsup, Peter Olsenip (IA) §37 atorlugu akissuteqaataani takuneqarsinnaavoq.
Akissummi tassani ilanngunneqarsimavoq innuttaasunit 12.754-init 8.043-t ukiunik tallimanik pisoqaassusilinnik akiligassatigut kinguaattooruteqartut.
Akiliisitsiniaaneq naammanngitsoq
Peter Olsen apeqquteqaatimini tunngavilersuutigaa misilittakkat takutikkaat akiitsut ukiunit tallimanit pisoqaassuseqarnerugaangata akiliisitsiniaanerup naammaginartannginnera.
Akiitsut ukiut tallimat sinnerlugit pisoqaassuseqartut qanoq amerlatiginersut maanna akilersorneqarnersut kisitsisaatigineqanngimmata, Aningaasaqarnermut Naalakkersuisup erseqqinnerusumik akisinnaanngilaa.
Taassumali ilisimatitsissutigaa Akileraartarnermut Aqutsisoqarfimmi akiliisitsiniarnermut immikkoortortami 33-t pisortanut akiitsulinnik akiliisitsiniaasussatut atorfeqartut.