Innuttaasut eqqasuuteqartut, inuit tikeqqammersut pillugit politiinut nalunaarutiginnittalersimapput

Upernavimmi politiit innuttaasunit, illoqarfimmi inunnik Danmarkimiit tikeqqammersunik takunnittarsimasunit nalunaarfigineqartarsimapput. Politimesterip inunnut sakkortunerpaamik kaammattuutigaa, peqqinnissatigut oqartussat maleruaqqusaannik malinneqqullugit.

Upernavimmi innuttaasut eqqasuuteqarput. Eqqasuutigisaat tassaavoq, inuit Danmarkimiit tikeqqammersut illoqarfimmi angalaarlutik allanik eqitaarinnittarnerat.

Innuttaasut tupigusuutigaat, ammaaqqinnermi immikkoortoq siulliup atuutsinneqarnerani malittarisassat malillugit sooq angerlarsimaffimmi mattusimasoqannginnersoq.

Upernavimmi politiit Sermitsiaq.AG-mut uppernarsarpaat, innuttaasut inunnik Danmarkimiit tikeqqammerlutik illoqarfimmi angalaartunik takunnissimallutik nalunaaruteqarsimasut.

- Tamanna pillugu marloariarluta sianerfigineqarsimavugut, politiit ilisimatitsipput.

Upernavimmi politiit taamatut assigusumik pisoqaqqissagaluarpat, qanoq iliortoqarnissaanik illoqarfimmi napparsimmavimmik oqaloqateqarput. Politiilli saaffiginnissutaasimasut pisortatigoortumik suliassanngortissimanngilaat.

Nalunaarummi nunamut tikinnermi malittarisassanik imaqartumi, ataasinngormat atuutilersumi, sumiiffiit arlallit najuuffigeqqusaanngillat. Allassimasoqanngilarli, illoqarfimmi pisuttuartoqassanngitsoq aamma inunnik naapitanik eqitaarisoqassanngitsoq. Inatsisimmi malillugit tamanna inerteqqutaanngilaq.

Inunnut kaammattuut

Kisianni inerteqqutaanngimmat, imaanngilaq taamaaliortoqassasoq, Politimesteri Bjørn Tegner Bay erseqqissaavoq. Inunnut nunamut tikeqqammersunut sakkortunerpaamik kaammattuutigaa, peqqinnissatigut oqartussat inassuteqaataannik malinneqqullugit.

- Inassuteqaatit tunngaviulluinnartut ilagaat, immitsinnut qanillivallaannginnissarput. Eqitaarisarneq akisussaassuseqanngippallaaqaaq, politimesteri erseqqissaavoq.

Nassuerutigaali, akisussaassuseqannginneq inatisit malillugit pinerluttuliornerunngitsoq.

- Akisussaassuseqannginneq inerteqqutaanngimmat, akisussaassuseqanngitsumik iliortoqarsinnaavoq, Bjørn Tegener Bay.

Powered by Labrador CMS