Innuttaasut amerleriarput - ingammik Nuummi
Kalaallit Nunaanni innuttaasut ukiualunni innuttaasut ikiliartoreerlutik amerleriarput. Inuit ingammik Danmarkimeersut, Asiameersut aamma Europameersut maani nunatsinni amerliartorput.
Apriilip aallaqqaataani 2019-imi inuit 56.201-t Kalaallit Nunaanni najugaqarput, tamannalu ukiup nikinneranit 209-nik amerleriarneruvoq, ukiullu siuliani piffissamut tassunga sanilliullugu inunnik 232-nik amerleriarfiuvoq.
Inuit Danmarkimit, Asiamit aamma Europamit tikittut innuttaasunik amerleriartitseqataapput, Naatsorsueqqissaartarfiup saqqummersitaani kingullermi tamanna takuneqarsinnaavoq.
Kalaallit ikinnerulertut
Sumi inunngorsimaneq naapertorugu kalaallit akornanni ikileriartoqarpoq, taamaalillutik apriilip aallaqqaataani 50.229-inngorput, taakkulu ukiup nikinnerani naatsorsorneqartnit 22-nik ikinnerupput. Kisianni 2018-imi apriilip aallaqqaataanut sanilliullugu inunnik 44-nik amerleriarsimapput.
Januaarimi 19-imi apriilip 19-annut sumi inunngorsimaneq malillugu allannguutit:
- Kalaallit Nunaat: - 22
- Savalimmiut: - 3
- Danmark: + 168
- Avannarliit: + 8
- Europa: + 21
- Afrika: + 1
- Amerika: + 10
- Asia: + 25
- Oceanien: + 1
Amerlanerit
Innuttaasut amerleriarnerpaaffianut tunngatillugu illoqarfiit pingaarnersaata kommunia siuttuuvoq. Nuuk ingammik nutaanik innuttaasortaartorpoq, ukiumit nutaamit inuit 255-nik amerleriarput, kommuni tamakkerlugu inuit 198-nik amerleriartut.
Ukiumit nutaami apriilip aallaqqaataata tungaanut kommunini allannguutit imaapput:
- Kommune Kujalleq: + 16
- Kommuneqarfik Sermersooq: + 198
- Qeqqata Kommunia: - 35
- Kommune Qeqertalik: - 9
- Avannaata Kommunia: + 39
- Avaanit: +/- 0