Nuuk
Innuttaasut ajornartorsiutillit aqqusinermi angalaarlutik ujartuisartunit ikiorneqartalissapput
Aqqusinerni angalaarlutik ujartuisartut marluk Nuummi inuuniarnermikkut ajornartorsiuteqartunut attaveqartartussaassapput
Kommuneqarfik Sermersuup aqqusinerni angalaarlutik ujartuisartut marluk Nuummi inuuniarnermikkut ajornartorsiuteqartunut angerlarsimaffeqanngitsunulli ujartuisalissapput.
- Kommuneqarfik Sermersuumi innuttaasut ilaat ajornartorsiuteqaraluarlutik ikiorneqarnissartik pillugu qanoq iliuuseqarneq ajorput, kommuneqarfik tusagassiuutinut nalunaaruteqarpoq.
Sapaatip akunnerata siuliani aqqusinermi sullissisussat siunnersuutigineqarpoq maannalu atuutsinneqalerluni.
Atungarliornerpaat oqartussanut attaveqarusunneq ajorput. Taakkuali aqqusinerni angalaarlutik ujartuisartunit attaveqaataassallutik.
- Aqqusinerni angalaarlutik ujartuisartut innuttaasut ajornartorsiuteqartut oqartussanut taakkulu ikiorsiisarnernut neqeroorutaannut attaveqaataassapput, Isumaginninnermut, Suliffeqarnermut Inuussutissarsiornermullu ataatsimiititaliap siulittaasua, Charlotte Ludvigsen (IA) tusagassiuutinut nalunaarummi taama oqarpoq..
Atuaruk: Ujartueqatigiit atornerluisut aamma angerlarsimaffeqanngitsut nanisassavaat
Aqqusinerni angalaarlutik ujartuisassapput saaffiginnittoqarsimatillugulu orniguttassallutik.
Isumassuinermik, ikorfartorneqarnissamik, perorsaanermut sulisunit ikiorneqarnissamik allatulluunniit pisariaqartitsisut saaffiginninneq ajortut kommuni isumaqarpoq.
Aqqusinerni angalaarlutik ujartuisartut innuttaasut ajornartorsiuteqartut oqartussanut taakkulu ikiorsiisarnernut neqeroorutaannut attaveqaataassapput. Inuuniarnermikkut ajornartorsiuteqartut pisariaqartitaannut soorlu isumaginninnikkut sullissisunut, ulluunerani isersimaartarfinnut, nakorsanut ilaqutaannullu taamatullu piaartumik ikiorneqarnissamik pisariaqartitsippata, aaqqusinerni angalaarlutik ikiorsiisartunit attaveqarniarneranni ikorneqartassapput, Charlotte Ludvigsen (IA) oqarpoq.
Aqqusinerni angalaarlutik ujartuisartut isumaginninnikkut suliassanik suliaqartassanngillat.
Aqqusinerni angalaarlutik ujartuisartut marluk akissarsiassaat pillugit ukiumut 600.000 koruunit missigersuutinit illuartinneqartassapput.